News Georgia-ի փոխանցմամբ՝ ընդդիմադիր միլիարդատեր Բիձինա Իվանիշվիլիի գլխավորած «Վրացական երազանք» քաղաքական կոալիցիան իր ակտիվիստներին ու համակիրներին կոչ է արել չվախենալ իշխանությունների գործողություններից և հանգիստ շարունակել իրենց գործունեությունը:
Այս մասին այսօր կայացած մամլո ասուլիսի ժամանակ հայտարարել է գործարարի մամլո քարտուղար Մայա Փանջիկիձեն՝ մեկնաբանելով «Վրացական երազանքին» աջակցող անձանց հանդեպ Վերահսկիչ պալատի գործողությունները.
«Մեր ակտիվիստների նկատմամբ իրականացվող տեռորը դուրս է գալիս խելամտության շրջանակներից, սակայն իշխանությունները դրանով չեն հասնի ոչնչի: Կատարելապես հասկանալի է, որ դրա պատճառը իշխող ռեժիմի խուճապային տրամադրությունն է: Ամեն դեպքում մենք պաշտպանելու ենք մեր համակիրներին, որոնց կոչ եմ անում հանդարտություն պահպանել և շարունակել իրենց գործունեությունը»:
Հիշեցնենք, որ վերջին օրերին Վերահսկիչ պալատը ֆինանսական մեքենայությունների պատճառաբանությամբ պալատ էր կանչել Իվանիշվիլիի 300 համակիրների: Այդ կապակցությամբ Բիձինա Իվանիշվիլին հայտարարել է, որ Վերահսկիչ պալատը դարձել է Վրաստանի նոր դատախազություն:
