Գագիկ Ծառուկյանը իր սանիկ, աբովյանցի Արթուր Հարությունյանին՝ «Պալաչին», որոշել է սնանկացնել: Այդ մասին Արթուր Հարությունյանը հայտարարել էր լրատվամիջոցներից մեկին տված հարցազրույցի ժամանակ, որից հետո, մեր ունեցած հավաստի տեղեկություններով, լավ ժամանակներ չեն եկել Պալաչի համար:
Նշենք, որ Արթուր Հարությունյանը՝ Պալաչը, հարցազրույցում Գագիկ Ծառուկյանին մականունով էր դիմել, այնուհետև կարևոր շեշտադրում արել, ըստ որի՝ թեև Գագիկ Ծառուկյանը իր ելույթներում ասում է` պետք է օգնենք փոքր և միջին բիզնեսին, բայց առաջին խախտողներից մեկն ինքն է։
«Ինքն ասում է`իմ խոսքը գործ է, որը չի համապատասխանում իրականությանը, ինքը բիզնեսմենին նեղություն է տալիս, մարդկանց նեղություն է տալիս, մարդկանց ժամանակ է տալիս, որպեսզի Հայաստանը լքեն. բա կարելի՞ է նման բան:
Գիտենք, Աբովյանը Գագոյի գաղութն է, էս օդն էլ վարձով է տվել, որ շնչենք։ Բայց ո՛չ, ստեղ նորմալ մարդիկ են ապրում, դուխով են, ուզում են ազատ ապրել, հարգել բոլորին, թեկուզ այս տարածքի պատգամավորից բռնած:
Պարոն Ծառուկյան, Աբովյան քաղաքը քո սեփականությունը չէ, Աբովյանը բոլորինն է, նաև ձերն է, բայց միևնույն է՝ հաղթելու է ՀՀԿ-ն»:
Այս հարցազրույցից հետո ՀՀԿ գործադիր մարմնի նիստի ժամանակ քննարկվեց ՀՀԿ Աբովյանի շրջանային կազմակերպության անդամ Արթուր Գեղամի Հարությունյանի կուսակցական վարքագիծը, ըստ որի՝ միջանձնային հարաբերությունները երբեք չի կարելի տեղափոխել քաղաքական հարթություն, և հատկապես անթույլատրելի են կոալիցիոն գործընկերների հանդեպ ոչ կոռեկտ արտահայտությունները։ Արդյունքում Արթուր Հարությունյանին ՀՀԿ անդամին ոչ վայել վարքագծի համար հայտարարվեց խիստ նկատողություն:
Ըստ մեր հավաստի աղբյուրների՝ ՀՀԿ-ն Արթուր Հարությունյանին ամբողջությամբ հանձնել է Գագիկ Ծառուկյանին, որն էլ անձամբ է հաշվեհարդար տեսել սանիկի հետ՝ անձամբ ծեծելով նրան, որից հետո Արթուր Հարությունյանը լքել է երկիրը:
Մեր ունեցած տեղեկություններով՝ նա այս պահին գտնվում է Վրաստանում:
