«Առաջիկա ընտրությունները Հայաստանի ապագայի ընտրությունն են: Ես ուզում եմ ԲՀԿ-ն հնարավորինս մեծ պատասխանատվություն ունենա ապագայի կերտման գործում: Այս ընտրությունները ճակատագրական են լինելու»,- այսօր ԲՀԿ համագումարի ժամանակ իր ելույթում հայտարարեց ԲՀԿ անդամ Վարդան Օսկանյանը:
Նա առանձնացրեց երկրի համար կարևոր 2 հարց՝ արտագաղթ և ԼՂ հիմնախնդիր: Մարդահամարի պաշտոնական տվյալներով՝ ՀՀ-ում կա 2 մլն 800 հազար մարդ: Սա, Վ. Օսկանյանի խոսքով, նշանակում է, որ մենք իջել ենք 3 մլն-ի հոգեբանական շեմից, իսկ եթե կարճ ժամանակում երկրում առկա բացասական մթնոլորտը չփոխվի, ապա կհատենք 2.5 մլն-ի շեմը: «Մարդիկ գնում են, որովհետև կորցրել են հույսը, չեն կարողանում ապահովել հանապազօրյա հացը, գնում են, որովհետև չեն վստահում: Իրավիճակը փոխելու համար քաղաքական կամք է պետք, որ բոլորի համար կիրառվեն Սահմանադրությունն ու օրենքները»,- ասաց Օսկանյանն ու նշեց, որ հիմնական կենտրոնացումը պետք է լինի տնտեսության աճի վրա, քանի որ ՀՀ-ն իսկապես հետ է մնում մյուս երկրներից:
Անդրադառնալով ԼՂ խնդրին՝ Վ. Օսկանյանը նշեց, որ «մեր գլխին կախված է պատերազմի վտանգը», ինչը կանխելու համար մենք պետք է հնարավորինս շուտ ընդգրկվենք եվրոպական կառույցներում և երկրում ներդնենք եվրոպական չափանիշներ: Ըստ նրա՝ պետք է անշրջելի դարձնել այն, որ ԼՂՀ-ն երբեք չի կարող լինել Ադրբեջանի կազմում: «ԼՂ-ն պետք է մտնի Եվրոպական մեծ քաղաքականություն»,- շեշտեց Օսկանյանը:
