Ադրբեջանական 1news.az-ի փոխանցմամբ՝ ԱՄՆ Պետդեպարտամենտը չի բացառում, որ Իրանի հատուկ ծառայությունները մասնակից են փետրվարի վերջին Բաքվում ամերիկյան դեսպանատան դեմ կատարված հարձակման փորձին: Այս մասին նշված է Պետդեպարտամենտի տարածած հայտարարության մեջ.
«Բազում տարիների ընթացքում մենք հետևում ենք, թե ինչպես է Իրանի կառավարությունը բռնություն գործադրում իր քաղաքական առօրյայի առաջընթացի համար: Հաշվի առնելով, որ նա հանդես է գալիս ահաբեկչությունը հովանավորող երկրի դիրքերից՝ զարմանալի չէ, որ նա մասնակից է այդ իրադարձություններին:
Մենք բարձր ենք գնահատում Ադրբեջանի կառավարության հետ մեր համագործակցությունը և շարունակում ենք սերտորեն համագործակցել նրա հետ Բաքվում գտնվող մեր դեսպանատան ու դիվանագիտական անձնակազմի անվտանգության ապահովման հարցում»:
Հիշեցնենք, որ երեք օր առաջ ադրբեջանական կողմը հայտարարեց իրանական լրտեսական ցանցի բացահայտման մասին: Ձերբակալված 22 անձինք մեղադրվում են Իրանի Իսլամական հեղափոխության պահակազորի (SEPAH) հետ համագործակցության և ԱՄՆ-ի ու Իսրայելի դեսպանատների դեմ հարձակում նախապատրաստելու մեջ:
Ադրբեջանի Ազգային անվտանգության նախարարությունը հայտարարել է, որ այդ անձանց ձերբակալման ժամանակ նրանց մոտ հայտնաբերվել ու առգրավվել է հրաձգային զենք, փամփուշտներ, պայթուցիկ սարքեր և լրտեսական հանդերձանք:
