Facebook սոցիալական ցանցի էջերը, որոնց միջոցով դեռահասները փորձում են արժանանալ «ամենագեղեցիկ դեռահաս» տիտղոսին, որակվել են որպես «խայծ՝ մանկապիղծների համար»:
Daily Mail-ը գրում է, որ վերջին մի քանի շաբաթվա ընթացքում սոցիալական ցանցում սկսվել են մի շարք մրցույթներ, որոնց մասնակցելու համար դեռահասները պետք է տեղադրեն իրենց լուսանկարները և օգտատերերը պետք է քվեարկեն դրանց համար:
Հարյուրավոր տղաներ էջերում տեղադրում են իրենց լուսանկարները, որտեղ նրանք վերնաշապիկներ չեն կրում, իսկ աղջիկներն աշխատում են լուսանկարներում ունենալ որքան հնարավոր է քիչ հագուստ:
Նա, ով ստանում է ամենաշատ ձայները, համարվում է այդ շաբաթվա «ամենագեղեցիկ դեռահասը»:
Բայց թվացյալ անմեղ խաղն իրականում մեծ խնդիրներ է առաջացնում: Սոցիալական ցանցի այս էջերի պատճառով հիմնականում բարկացած են երեխաների ծնողները՝ նկարների վերաբերյալ արված մեկնաբանությունների պատճառով:
Բարկության այս ալիքն անգամ ստիպել էր Facebook ընկերությանը փակել այդ էջերից մեկը, որը 100.000 օգտատեր ուներ: Ընկերությունն ասել էր , որ էջը խախտել էր ընկերության կողմից ներկայացված պարտավորությունները։
