Տեխաս նահանգի Հյուսթոն քաղաքում մարտի 16-ին բացվել է միջազգային 14-րդ ֆոտոբիենալեն, որն այս տարի նվիրված է Ռուսաստանի, իսկ ավելի ճիշտ՝ խորհրդային և հետխորհրդային շրջանի լուսանկարի պատմությանը: Բիենալեի կայքում նշվում է, որ «Ժամանակակից ռուս լուսանկարչություն» նախագիծն ընդգրկում է ավելի քան 60 տարի։ Այս մասին գրում է lenta.ru-ն:
Նախագծի ռուսական հատվածը բաղկացած է երեք հիմնական ցուցադրությունից` «Ձնհալ» (1940–1970-ական թթ.), որում ընդգրկված են մեծ մասամբ Լյումեր եղբայրների անվան լուսանկարչության կենտրոնի հավաքածուից ընտրված լուսանկարներ, «Վերակառուցում» (1980-2010 թթ.), ինչպես նաև «Նոր սերունդ» (2007-2012 թթ.): Ներկայացված է 140 լուսանկարչի մոտ 800 աշխատանք` Ռուսաստանից, Ուկրաինայից, Բելառուսից:
Բիենալեի շրջանակներում անցկացվում է ևս մեկ ցուցահանդես, որը նվիրված է խորհրդային լուսանկարիչներին, World Press Photo-ի մրցանակակիրներին:
Բիենալեն կտևի մինչև ապրիլի 29-ը:
