Ձեռնարկությունների ինկուբատոր հիմնադրամն (ՁԻՀ) «ԷմԼաբ» ծրագրի շրջանակներում վաղը կանցկացնի «Մոբայլ Միկրոաշխատանքի միջազգային մրցույթ m2Work՝ հազարավոր աշխատատեղեր միլիոնավոր պատվերներից» աննախադեպ միջոցառումը՝ հայաստանյան տարբեր ուսումնական հաստատությունների և ՏՏ ընկերությունների մոտ հարյուր ուսանողների և երիտասարդ մասնագետների մասնակցությամբ:
Միջոցառումն ուղղված է խրախուսելու երիտասարդների շրջանում նորարար գաղափարների ստեղծումը միկրոաշխատանքը խթանող մոբայլ լուծումների վերաբերյալ, և օգնելու նրանց այդ գաղափարներով մասնակցելու Համաշխարհային բանկի ԻնֆոԴեվ ծրագրի հայտարարած միջազգային m2Work մրցույթին: ՁԻՀ-ի մասնագետները մասնակիցներին կներկայացնեն միկրոաշխատանքի հաջողված օրինակներ և կօգնեն նրանց ստեղծել իրենց գաղափարները, ձևակերպել դրանք, և ներկայացնել միջազգային ժյուրիին:
ՁԻՀ-ից «Առաջին լրատվական»-ին հայտնեցին, որ այս միջոցառումը հայ երիտասարդներին բացառիկ հնարավորություն է տալիս ոչ միայն ներգրավվելու համաշխարհային m2Work մրցույթին և ստանալու բարձրարժեք մրցանակներ հետաքրքիր գաղափար ներկայացնելով, այլև ստանալու իրենց գաղափարների իրականացման համար միջոցներ և մասնագիտական աջակցություն:
Միջազգային m2Work մրցույթը նպատակ ունի խթանելու միկրոաշխատանքների շուկաների զարգացումը և օգնելու զարգացող երկրների հազարավոր պոտենցիալ միկրոաշխատողներին համար աշխատանքի/եկամուտի աղբյուրներ ստեղծելով:
