ԲՀԿ-ն ոչ մի պայմանավորվածություն չունի, այսօր լրագրողների հետ հանդիպման ժամանակ հայտնեց ԲՀԿ քաղաքական խորհրդի անդամ Տիգրան Ուրիխանյանը` անդրադառնալով ԲՀԿ արտահերթ 6-րդ համագումարին:
Նա նշեց, որ համագումարի օրակարգային հարցը լինելու է նախընտրական ծրագրի հաստատումը: Ըստ նրա` մեծամասնական ընտրակարգով թեկնածուների առաջադրման վերաբերյալ որևէ ինտրիգ փնտրել չարժե:
«Ուզում եմ հստակեցնել, որ ԲՀԿ-ն մեծամասնական ընտրակարգով թեկնածուներ առաջադրելու է`ելնելով նպատակահարմարությունից, իսկ նպատակահարմարությունը պայմանավորված կլինի տվյալ ընտրատարածքում հասարակական գործունեություն իրականացնող անձանց ՕԳԳ-ով:
Այնտեղ, որտեղ ունենք այնպիսի մարդիկ, ովքեր հասարակության վստահությունն են վայելում, նրանք էլ կառաջադրվեն: Որոշումը հետևյալն է` առաջադրել նրանց, ովքեր կարող են պատասխանատվություն ստանձնել: Որևէ պայմանավորվածություն լինել չի կարող: Առաջադրվելու են այնքան մարդիկ, որքան կուսակցությունը նպատակահարմար կհամարի»,- մեկնաբանեց Տ. Ուրիխանյանը` հավելելով, որ
համամասնական ցուցակը կհրապարակվի համագումարից հետո՝ օրենքով սահմանված ժամկետում:
Նրա խոսքով` հանրությունը ԲՀԿ ցուցակում կբացահայտի շատ ճանաչված, հարգված և սիրված մարդկանց, ովքեր գնում են ֆունկցիոնալ գործառույթ իրականացնելու, ոչ թե իրավիճակ փոխելու:
Անդրադառնալով ԲՀԿ ցուցակում գործարարների ներգրավվածությանը` նա նշեց, որ կուսակցության համամասնական ընտրացուցակում չեն լինի մարդիկ, ովքեր օրենքով սահմանված կարգով իրավունք չունեն առաջադրվելու:
«Մեր կադրերն աչքի են ընկնելու հենց դրանով: Երիտասարդների և կանանց ընդգրկվածություն նույնպես լինելու է` հաշվի առնելով մեր ունեցած մարդկային ռեսուրսը»,- եզրափակեց բանախոս Տիգրան Ուրիխանյանը:
