2012թ. խորհրդարանական ընտրություններին իշխանություններն արդեն իսկ սկսել են մեծ թափով պատրաստվել։ Ընդհուպ սկսել են քննարկել նախընտրական ցուցակը, ուստի պատահական չեն նաև ՀՀԿ-ական պատգամավորների ինքնագոհ հայտարարությունները, թե ապագա խորհրդարանում ՀՀԿ-ն բացարձակ մեծամասնություն է կազմելու:
Մեր ունեցած հավաստի տեղեկություններով, արդեն գրեթե պարզ է, թե ովքեր ՀՀԿ ցուցակում որևէ ձևով չեն ընդգրկվի 2012 թվականին և կզրկվեն հաջորդ խորհրդարանի պատգամավորական մանդատից: Հստակ է, որ այն յոթ պատգամավորները, ովքեր 2008թ. փետրվարի 22-ի ընդդիմության հանրահավաքի ժամանակ հայտարարել էին, թե միանում են Լևոն Տեր-Պետրոսյանին և ժողովրդին, ապագա խորհրդարանում աթոռ չեն ունենալու: Հիշեցնենք, որ 2008թ. փետրվարի 22-ին ԱԺ հանրապետական պատգամավոր, «Վեդի Ալկոյի» սեփականատեր Մանվել Ղազարյանը հանրահավաքի ընթացքում հայտարարեց, որ համաժողովրդական շարժմանն են միացել ԱԺ պատգամավորներ պաշտոնաթող գեներալ Սեյրան Սարոյանը` ՀՀԿ, Հրանտ Գրիգորյանը` ՀՀԿ (գեներալ-լեյտենանտ Մանվել Գրիգորյանի եղբորորդին), Աֆղանստանի վետերանների միության նախագահ Արմեն Մխիթարյանը` ՀՀԿ, նախկին ազատամարտիկ Ռուստամ Գասպարյանը` ԲՀԿ, Կարո Կարապետյանը` ԲՀԿ, Տիգրան Ստեփանյանը` ԲՀԿ: Սակայն ժամեր ու օրեր անց, նրանք հայտարարեցին, որ շարունակում են մնալ Սերժ Սարգսյանի կողքին:
Եթե երկու տարի առաջ «հետ գնալով» վերոնշյալ պատգամավորները կարողացան փրկել իրենց ունեցվածքը, ապա այս անգամ իշխանությունները որոշել են ոչ միայն մանդատից զրկել, այլև ունեցվածքից:
ՀՀԿ-ական պատգամավոր Մանվել Ղազարյանը, ով, մեր տեղեկություններով, 2008-ի հանրահավաքի ժամանակ ժողովրդին միացած պատգամավորների ցուցակը կարդալու համար իր կուսակցական ընկերների կողմից «դավաճանի» պիտակ է ստացել, մեզ հետ զրույցում ասաց, որ ինքը տեղյակ չէ իշխանությունների պատրաստած ցուցակից: «Ընտրություններին դեռ մեկ տարի կա, և իմ համար դեռևս անիմաստ է այդ մասին խոսել: Նման ենթադրություններ ինձ համար չկան, մի խոսքով` ժամանակից շուտ էլ չխոսենք», – ասաց Ղազարյանը և անջատեց հեռախոսը` չցանկանալով լսել մեր հաջորդ հարցը:
ԱԺ ԲՀԿ խմբակցության պատգամավոր Տիգրան Ստեփանյանը ևս ընդգրկված է իշխանությունների սև ցուցակում և լսելով այդ մասին ասաց. «Ո՞վ է ասել, որ ես չեմ դառնում պատգամավոր: Ես նման ինֆորմացիա ձեզանից եմ լսում: Ես մեկնաբանություն չունեմ, ես առաջադրվելու եմ, իմ թեկնածությունն առաջադրելու ոչ մի խնդիր չունեմ ոչ մեկի հետ: Ու 2008թ. էլ իմ հետ կապված ոչ մի դեպքեր չեն եղել»: Ստեփանյանը նաև հերքեց, որ 2008-ին Ազատության հրապարակում հնչել է նաև իր անունը` որպես ժողովրդին միացած պատգամավոր. «Իհարկե, ոչ, ոչ մի քայլ էլ չի եղել, ոչ մի ձևի, ինչ-որ մեկը կա՞, որ ինձ տեսել է այնտեղ: Նման բաներ չեն եղել, դա էնքան որ աղմուկ սարքեցին: Ես հերքել եմ այդ ամենը»:
Թիվ 21 ընտրատարածքի պատգամավոր, ԲՀԿ-ական Ռուստամ Գասպարյանն էլ, չհասկանալով, թե խոսքն ինչ ցուցակների մասին է, ասաց. «Ես չկամ ցուցակում և ցուցակում չեմ էլ ուզում լինեմ, ես էն ժամանակ էլ դրել եմ մեծամասնականով, հիմա էլ կդնեմ»: Երբ պարոն Գասպարյանին ասացինք, թե ինչ ցուցակների մասին է խոսքը, նա պատասխանեց. «Անցած անգամ էլ ես չկայի էդ ցուցակում, դե գիտեք, ես «Բարգավաճ» կուսակցությունից եմ, Դուք «Հանրապետական» ցուցա՞կն ի նկատի ունեք»: Հիշեցնելով 2008թ. փետրվարի 22-ի հանրահավաքը` ևս մեկ անգամ հստակեցրինք պարոն Գասպարյանի համար իշխանությունների մտադրությունը և նրանց կազմած ցուցակի իմաստը: Ի պատասխան ԲՀԿ-ական պատգամավորն ասաց. «Ես չեմ միացել Լևոն Տեր-Պետրոսյանին, ես գրել եմ, որ ես ժողովրդի հետ եմ: Ցուցակները հաստատ ինձ չեն խանգարելու, քանի որ ես անցած անգամ էլ դրեցի իշխանության թեկնածու Ալիկ Պետրոսյանի դեմ ու հաղթեցի: Իհարկե, դեռ առջևում ժամանակ կա, եթե նպատակահարմար գտնեմ, որ ինձ նորից պետք է թեկնածություն դնել, ապա անպայման կդնեմ ու կպայքարեմ»:
«Ժամանակ» օրաթերթ
