Մինչև ընտրությունները կոալիցիան պետք է մասնատվի: Չմասնատվելու դեպքում դա կլինի նախընտրական բլոկ: Իսկ եթե նման խնդիր առաջանա, դա արդեն, իր հերթին, կվերածվի մեկ այլ խնդրի: Տարբեր քաղաքական ուժեր են կոալիցիայի մեջ, և յուրաքանչյուրը ունի տարբեր ծրագրեր, հետևաբար ճիշտ կլինի, որ իրենց ծրագրերով գնան ընտրությունների: Ամեն դեպքում կոալիցիայի մասնատումը աշնանային նստաշրջանից շուտ չի կարող տեղի ունենալ: Բայց քաղաքական առումով կանխատեսումները կարող են տարբեր լինել և իրականությանը չհամապատասխանել, որովհետև մեկ օրվա մեջ կարող ենք արթնանալ և մեկ ուրիշ իրավիճակի ականատես լինել: Այս մասին մեզ հետ զրույցում ասաց ԱԺ հանրապետական պատգամավոր Հովհաննես Սահակյանը:
– Զինվորական դատախազ Արմեն Խաչատրյանին երեկ փոխարինեց ՀՀ նախագահի օգնական Մարդու իրավունքների եվրոպական դատարանում ՀՀ կառավարության ներկայացուցիչ Գևորգ Կոստանյանը: Ըստ Ձեզ, ինչի՞ հետևանք է այդ փոփոխությունը, և ի՞նչ կարելի է սպասել այդ նշանակումից:
– Գնահատելով անցյալ տարեվերջին ընդհանուր փոփոխությունները, որոնք մաս էին կազմում և՛ կոալիցիային, և՛ ձևավորել էին կառավարությունը, տրվեց համապատասխան գնահատական կատարված և չկատարված աշխատանքների համար: Այս պարագայում, եթե որևէ ոլորտում եղել է թերացում, ենթակա է եղել փոփոխությունների: Ժամանակակից աշխարհը մի փոքր արագ է զարգանում, և պետք է այդ զարգացումներին ընդառաջ քայլենք:
– Ժամանակը ցույց է տալիս, որ այդ նույն համակարգում կադրերը փոխվում են, օրենսդրությունը փոխվում է, բայց բուն խնդիրները մնում են անփոփոխ: Նույն ՊՆ համակարգի հետ կապված մի շարք հասարակական, քաղաքական, օրենսդրական նախաձեռնություններ և փոփոխություններ եղան, բայց բանակի խնդիրները, զորօրինակ` սպանությունների թիվը չնվազեցին: Օրինակ` Իջևանի դեպքը, երբ հրամանատարը այնքան էր զինվորին ծեծել, որ վերջինս մահացավ:
– Մենք նորանկախ պետություն ենք, և այն երևույթները, որոնք արմատացած են եղել անկախության տարիներին, այն մարդիկ որոշակի ծառայություն են մատուցել մեր երկրին, մեր պետությանը, մենք, իհարկե, դա գնահատում, ողջունում ենք: Միաժամանակ, որոշակի առումով պարտական ենք նրանց, որովհետև պատերազմի դաշտում իրենց կյանքն են դրել կշեռքի նժարին: Չնայած դա չի կարելի շահարկել, բայց մենք այդ կռվող տղաների հանդեպ ունենք բավական դրական վերաբերմունք:
– Ստացվում է` ձեր վերաբերմունքին արժանացած տղաները թշնամուց հայ զինվորին պաշտպանել են, որ սեփական ձեռքերով նրանցից ազատվեն:
– Մենք չենք կարող նրանց վարքագծի վրա հատուկ ռեժիմ սահմանել, եթե գինովացած կամ զայրացած վիճակում են: Կան երևույթներ, որոնք մենք չենք կարող վերահսկել: Դա իրենց ներքին պատասխանատվությունից է գալիս:
– Բայց եթե նման դեպքերը համապատասխան պատիժ ստանային, չե՞ք կարծում, որ այդ նույն հրամանատարների աչքը կվախենար:
– Այո, համամիտ եմ: Եվ ինչպես վերջերս ականատեսն ենք լինում, նման դեպքերը ոչ թե կոծկվում, ժողովրդի լեզվով` ծածկադմփոց են արվում, այլ հրապարակային ձևով են պատժվում:
– Ոստիկանության 7-րդ օպերատիվ փնտրողական վարչության պետ Ատոմ Խաչատրյանին փոխարինեց նախկին գործարար Մուշեղ Ղազարյանը` 6-րդ վարչության հատուկ նշանակության ջոկատի հրամանատար Դավիթ Ղազարյանի եղբայրը: Այս կադրերը անմիջական մասնակցություն են ունեցել մարտի 1-ի իրադարձություններին, սակայն նրանք ուղղորդվել են Ռոբերտ Քոչարյանի հրամանով: Կարելի՞ է ասել, որ Սերժ Սարգսյանը համակարգ է ներդնում իր մարդկանց` հաջորդ ընտրություններում իր թիկունքը ամրապնդելու համար:
– Երկրի ղեկավարը, երբ ստանձնում է այդ պաշտոնը, նա իր և ուրիշի մարդկանցով շրջապատվելու խնդիր չունի: Նախագահն է նշանակում այս կամ այն պաշտոնյային և ուրիշի մարդկանցով շրջապատվելու խնդիր չունի: Եթե մենք ունենք նախագահ, ապա նա է նշանակում այս կամ այն պաշտոնյաներին, և նախագահն է իրականացնում որոշակի գործառույթներ, ինչպես նաև պատասխանատվություն կրում այս կամ այն գործառույթների իրականացման համար: Հետևաբար այստեղ իր մարդկանց ներդնելու խնդիր չեմ տեսնում: Մենք ընտրություններին պատրաստվում ենք ոչ թե իրավապահ համակարգով, այլ քաղաքական մոդելով: Իսկ նախորդ ընտրություններին իրավապահ համակարգը պահպանել է հասարակական կարգը:
– Մեր աղբյուրների փոխանցմամբ, իրավապահ համակարգում սկիզբ առած փոփոխությունները հասնելու են Պաշտպանության նախարարության ամենաբարձր օղակների փոփոխությանը:
– Ես չեմ կարծում, որ այսօր նման խնդիր կա և եթե կա էլ, ապա դա որպես երկրի բարձրագույն մարմնի` նախագահի որոշելիքն է: Այս կամ այն նախարարի աշխատելու ժամանակը, ոճը, ձևը, ինչու չէ նաև գնահատական տվողը ինքն է: Իսկ երբ տեղի ունենան կադրային փոփոխություններ, նոր կարող ենք գնահատականներ տալ, թե փոփոխության մոտիվացիան որն էր: Իմ կարծիքով` Սերյան Օհանյանը կատարում է իր պարտավորությունները:
– Անցում կատարենք քաղաքական դաշտին: ԲՀԿ համագումարից հետո քաղաքական դաշտում նոր, սուր զարգացումներ ակնկալո՞ւմ եք:
– Դա կախված է իրենց որոշումներից: Եթե ուղղակի հերթական համագումարն է, չեմ կարծում, որ որոշակի փոփոխություններ կլինեն: Իսկ ակտիվությունը կախված է նրանց քաղաքական շեշտադրումներից: Համագումարի ժամանակ եթե լինեն որոշակի շեշտադրումներ` կապված քաղաքական դաշտի հետ, ապա տրամաբանական է, որ կլինի նաև որոշակի աշխուժացում:
– Նախընտրական շրջանում, ասում են, «Հանրապետականը» փորձելու է թուլացնել ԲՀԿ դիրքերը` նախապատվությունը տալով ՕԵԿ–ին:
– Ես կխուսափեմ գնահատականներ տալուց: Սրանք քաղաքական տարբեր ուժեր են. և՛ ՕԵԿ–ը, և՛ ԲՀԿ–ն աշխատում են իրենց ռազմավարությանը համապատասխան: Իսկ ինչ վերաբերում է մեզ` մենք մեր բնականոն հունով շարունակում ենք դեռևս աշխատել: Բայց պարզ է, որ նախընտրական շրջանում մեր գործունեությունը և այն ուղին որով գնում ենք մի փոքր այլ կլինեն:
– Գագիկ Բեգլարյանի և Տիգրան Կարապետյանի միասնությունը ի՞նչ զարգացումներ կառաջացնի քաղաքական դաշտում:
– Գագիկ Բեգլարյանը մինչ օրս շարունակում է մնալ «Հանրապետական» կուսակցության անդամ և քանի դեռ անձամբ դիմում չի գրել և ազատվել կուսակցությունից, ես հակված եմ թերահավատորեն մոտենալ նոր կուսակցության ստեղծման գաղափարին:
– Ըստ ձեզ` մինչև ԵԽԽՎ ձմեռային նստաշրջանը քաղբանտարկյալները ազատ կարձակվե՞ն, թե՞ ոչ:
– Ազատության մեջ հայտնվելու համար կա երեք տարբերակ` ներման դիմումը, պատժաժամկետի լրացումը կամ եթե իրավական հարթության մեջ նոր գործընթացներ տեղի ունենան: Այդ երեք տարբերակներից մեկը եթե աշխատի, շատ հավանական է, որ մինչև ԵԽԽՎ ձմեռային նստաշրջան ազատ արձակվեն:
