«Ֆորմուլա-1»-ի գործող կրկնակի չեմպիոն Սեբաստիան Ֆետտելը, ով հանդես է գալիս «Ռեդ Բուլլ»-ի կազմում, 2012 թվականին առաջին անգամ կմասնակցի բրիտանական Հուդվուդում կայանալիք «Արագության փառատոն»-ին: Ավանդական միջոցառման կազմակերպիչները փառատոնից առաջ կազմակերպված պաշտոնական ասուլիսի ժամանակ հարապարակել են հրավիրված հյուրերից մի քանիսի անունները:
Բացի Ֆետտելից, Հուդվուդ կմեկնեն նաև «Ֆորմուլա-1»-ի նախկին ավտոարշավորդ և «Լե-Մանի 24 ժամ» մրցաշարի վեցակի հաղթող Ժակի Իքսը, «Ֆորմուլա-1»-ի նախկին ավտոարշավորդ Յոհեն Մասսը, WTCC-ի եռակի չեմպիոն և ներկայումս DTM-ի ավտոարշավորդ հանդիսացող Ռիչարդ Էթվուդը, ինչպես նաև հանրահայտ ավտոարշավորդ և «Իգլ» թիմի նախկին նախագահ Դեն Հերնին:
Motor Sport Magazine-ի հաղորդմամբ փառատոնի գլխավոր մակնիշ կլինի «Լոտուս»-ը, որն այս տարի նշում է իր 60-ամյակը, ինչպես նաև փառատոնի ընթացքում իրենց 50-ամյակը կնշեն «Բրեբեմ»-ը և Group C կարգի բոլիդների 30-ամյակը:
