Թուրքական Dünya Bülteni կայքի փոխանցմամբ՝ Թուրքիայի արտգործնախարար Ահմեդ Դավութօղլուն մեկնաբանել է Սիրիայում երկու թուրք լրագրողների անհետանալը.
«Մենք բոլոր ջանքերը գործադրում ենք նրանց գտնելու համար: Հենց որ մենք ստացանք լրագրողների անհետացման լուրը, ձեռնամուխ եղանք նրանց հայտնաբերելու գործունեությանը: Տվյալ խնդրի շուրջ մենք բանակցում ենք նաև սիրիական կողմի հետ: Բնական է, որ այդպիսի պայմաններում պետք է բոլորից շատ հարգանք ցուցաբերել լրագրողների ու ԶԼՄ-ների նկատմամբ: Հուսով եմ, որ նրանք ողջ և առողջ կվերադառնան հայրենիք»:
Հիշեցնենք, որ մեկ շաբաթ առաջ թուրքական Gerçek Hayat (Իրական կյանք) ամսագրի մերձավորարևելյան ներկայացուցիչ Ադեմ Օզքյոսեն և օպերատոր Համիթ Ջոշքունը Թուրքիայի հարավ-արևելյան հատվածում ընկած Հաթայ նահանգից մեկնել են սիրիական Իդլիբ, և օրեր շարունակ նրանցից որևէ տեղեկություն չկա:
