Տիգրան Կարապետյանի աչքը լույս

Ժողովրդական կուսակցության քաղխորհրդի նախագահի 12.01.2011 թ. իրազեկումը` ս/թ. հունվարի 19-ին, ժամը 15-18-ը Մատենադարանի հարակից տարածքում հանրահավաք անցկացնելու վերաբերյալ Երևանի քաղաքապետի լիազոր ներկայացուցիչն ընդունել է ի գիտություն: «Առաջին լրատվականը» փորձեց հենց Ժողովրդական կուսակցության նախագահ Տիգրան Կարապետյանից տեղեկանալ, թե այս անգամ ինչին է նվիրված լինելու հանրահավաքը, ի պատասխան կուսակցության նախագահն ասաց, որ իրենց չեն արտոնել, և իրենք չեն կարող հանրահավաք անցկացնել, բայց խնդրելով մեկ րոպե` ստուգեց և տեղեկացավ, որ իսկապես թույլ են տվել: Փաստորեն, «Առաջին լրատվականը» ավետաբեր եղավ Ժողովրդական կուսակցության համար: Տիգրան Կարապետյանն ասաց, որ հանրահավաքը բաղկացած է լինելու երկու մասից. «Մի մասը լինելու է սոցիալական. անդրադառնալու ենք թանկացումներին: Եթե այսօր չկան իրավիճակը շտկելու մեխանիզմներ` այն առումով, որ ասենք թե մարդիկ ունենան աշխատատեղեր, ինչ-որ մեխանիզմներ, որոնք ցույց չեն տալիս ռեալ աճի մեխանիզմը, այդ տեղից արդեն դուրս է գալիս քաղաքական բլոկը, որտեղ անվստահություն է հայտնվում այս կառավարությանը, որը չի ստեղծում մեխանիզմներ, որոնք հնարավորություն կտան մարդուն ազատ ապրել: Մենք պահանջելու ենք նախագահից, ամբողջ էլիտայից, որ հայ մարդու արժանապատվությունը չոտնահարվի, և այսօրվա կյանքը կտրուկ ձևով փոխվի դեպի լավը»:
Տիգրան Կարապետյանը վստահեցրեց, որ հունվարի 19-ի հանրահավաքի մասնակիցների թիվը 5 անգամ ավել կլինի, քան նախորդ հանրահավաքինը. «Ես վստահ եմ, որ այս հանրահավաքին մասնակիցների թիվը 50.000-ից ավել կլինի»: