Amnesty International միջազգային կազմակերպության իրավապաշտպանները նոր ապացույցներ են գտել Սիրիայի վարչակարգի կողմից ընդդիմության դեմ կիրառվող կտտանքների վերաբերյալ։ Սիրիայի իշխանությունները հերքում են այդ մեղադրանքները:
Ինչպես հաղորդում է BBC-ն, իրավապաշտպանները Հորդանանում հանդիպել են սիրիացի փախստականների հետ, որից հետո զեկույց են հրապարակել՝ «Ես ցանականում էի մահանալ» վերտառությամբ: Նրանց խոսքերով՝ 25 մարդ, որոնց հետ հաջողվել է զրուցել, պատմել են, թե ինչ վատ են վարվում իրենց հետ և ինչ տանջանքների են ենթարկում բանտերում:
Իրավապաշտպանների խոսքերով՝ ոմանց բանտերում կախել են և բռունցքներով ու փայտերով հարվածել: Օտարերկրյա լրագրողների մուտքը Սիրիա խիստ արգելվում է, ուստի այս տվյալները անկախ աղբյուրներից հաստատելը դժվար է:
«Ականատեսների վկայությունները… խոսում են այն մասին, որ պատժի գոյություն ունեցող համակարգը ուղղված է գլխավորապես մարդկանց ստորացնելուն, նվաստացնելուն, որպեսզի ստիպեն լռել»,- ասել է Մերձավոր Արևելքում և Հյուսիսային Աֆրիկայում կազմակերպության ներկայացուցիչ Անն Հարիսոնը:
Զեկույցում նկարագրված են որոշ յուրահատուկ մեթոդներ, որոնք կիրառվում են բանտերում: Մասնավորապես նկարագրվում է, որ բանտարկյալների վրա ջուր են լցնում և էլեկտրահարում:
Ավելի ավելի վաղ՝ փետրվարին, կազմակերպության աշխատակից Նեյլ Սեմոնդսը BBC-ին պատմել էր, որ բանտարկյալներից մեկի ձեռքի մի մասը պայթեցրել են այն բանից հետո, երբ նա հրաժարվել է աղոթել երկրի նախագահ Բաշար Ալ-Ասադի նկարի առաջ:
Իրավապաշտպանները Սիրիայի իշխանություններից պահանջել են դադարեցնել խաղաղ ցուցարարների ձերբակալությունները և բանտարկյալների խոշտանգումները:
Առաջիկա օրերին ՄԱԿ-ը պատրաստվում է իր ներկայացուցիչներին ուղարկել Սիրիայի սահմանակից երկրներ: Ենթադրվում է, որ ՄԱԿ-ի դիտորդները կկարողանան փաստեր հավաքել, որոնք լույս կսփռեն կատարվող իրադարձությունների վրա:
