CNN Türk-ի փոխանցմամբ՝ թուրքական դատարանը Սվազի կոտորածի վերաբերյալ զարմանալի որոշում է կայացրել:
Հիշեցնենք, որ 1993 թվականի հուլիսի 2-ին սուննի արմատականների մի խումբ անսպասելիորեն շրջապատել ու այրել է Սվազի «Մադըմաք» հյուրանոցը, որտեղ հավաքվել էին մի շարք նկարիչներ, գրողներ ու երաժիշտներ՝ մասնակցելու 16-րդ դարի ալևի բանաստեղծ Փիր Սուլթան Աբդալին նվիրված միջոցառմանը: Արդյունքում, զոհվեց 37 ալևի մտավորական և հյուրանոցի 2 աշխատակից:
Եվ ահա Անկարայի ծանր հանցագործությունները քննող 11-րդ դատարանը վճռել է ազատ արձակել տվյալ գործով անցնող 7 կասկածյալներից 5-ին: Մյուս երկու կասկածյալներն էլ արդեն իսկ մահացել են:
Այս դատավճիռը բողոքի մեծ ալիք է բարձրացրել դատարանի շենքի մոտ հավաքվածների շրջանում, սակայն գործին միջամտել է ոստիկանությունը և ջրցան մեքենաների օգնությամբ ճնշել է նրանց բողոքի ակցիան:
