Բոլիվիայի նախագահ Էվո Մորալեսը երկուշաբթի Վիեննայում կայացած՝ ՄԱԿ-ի թմրանյութերի հարցերով հանձնաժողովի նիստին դարձյալ հանդես է եկել կոկայի պաշտպանությամբ: Այս մասին հաղորդում է RIA Novosti-ն՝ վկայակոչելով տեղի ԶԼՄ-ներին:
Մորալեսը ամբիոնին մոտեցել է կոկայի տերևները ձեռքին: Նրա ելույթն ուղեկցվել է ծափահարություններով:
«Ես խնդրում եմ բոլոր երկրներին, բոլոր միջազգային կազմակերպություններին ուղղել պատմական սխալը»,- ասել է նա նիստի մասնակիցներին՝ նկատի ունենալով այն հանգամանքը, որ ՄԱԿ-ի թմրամիջոցների մասին միասնական կոնվենցիայով կոկան դասվել է արգելված բույսերի շարքին:
Այնուամենայնիվ, Մորալեսը խոստացել է խստացնել պայքարը կոկայի անօրինական տարածման դեմ:
Բոլիվիայի իշխանություններն արդեն վաղուց հայտարարում են, որ կոկայի տերևները թմրանյութ չեն և կազմում են Անդերի մշակույթի մասը: Ընդ որում, Մորալեսը բազմիցս միջազգային մակարդակի հանդիպումների, այդ թվում՝ թմրանյութերի դեմ ՄԱԿ-ի կոնֆերանսների ներկայացել է կոկա ծամելով: Բոլիվիայում հնդկացի բնակչության 62-67%-ը կոկա է ծամում:
