ՀՀԿ համագումարում Սերժ Սարգսյանի հնչեցրած «Հավատանք, որ փոխենք» կարգախոսն ուղղված էր նախ՝ հանրությանը, երկրորդ լսարանը համագումարի դահլիճում նստած ՀՀԿ բազմությունն էր, իսկ երրորդը արտաքին խաղացողներն էին: Այս մասին այսօր կայացած մամուլի ասուլիսի ժամանակ ասաց «Նոր ժամանակներ» կուսակցության ղեկավար Արամ Կարապետյանը:
Անդրադառնալով ՀՀԿ ղեկավարի բուն ելույթին՝ նա նկատեց՝ Սերժ Սարգսյանը չէր պնդում, թե ամեն ինչ լավ է, սակայն միանշանակ է, որ լավի մասին նրա խոսքերը ելույթում գերակշռում էին:
«Իսկ ադ դեպքում որտեղի՞ց են Հայաստանում հաստատված աղքատության շեմն ու արտագաղթի ծավալները: Եթե ամեն բան այդքան լավ է, ինչո՞ւ են իշխանություններն անընդհատ փողեր խնդրում դրսից: Իսկ այն, ինչ ասվեց ՀՀԿ համագումարին, ուղղակի պոպուլիզմ էր: Այնտեղ որևէ նոր բան չասվեց»,- ասաց նա:
Ասուլիսի մյուս բանախոս, ՀՀԿ-ական պատգամավոր Մանվել Բադեյանը նկատեց, որ միջազգային կառույցներից գումարներ խնդրելը լիովին նորմալ է, քանի որ համաշխարհային ֆինանսատնտեսական ճգնաժամի ֆոնին նմանօրինակ քայլի դիմում են աշխարհի գրեթե բոլոր երկրները:
«Հատկանշական է, որ նախագահի ելույթում ուղենշային էր կոռուպցիայի դեմ պայքարը: Իսկ ԱՊՀ տարածքում չկա մի երկիր, ուր կոռուպցիան հաղթահարված լինի, օլիգոպոլիաներ ու մոնոպոլիաներ չլինեն»,- ասաց նա:
Անդրադառնալով «Հավատանք, որ փոխենք» կարգախոսին՝ Բադեյանը նկատեց, որ չգիտի՝ ո՞վ և ինչպե՞ս է մշակել այն: «Բայց ես համաձայն եմ այս բառերի հետ: Եթե անգամ ասում են, որ կարգախոսը ԱՄՆ նախագահի նույնօրինակ կարգախոսի թարգմանությունն է, այդուհանդերձ, պլագիատի մասին չարժե խոսել: Այդ ինչպե՞ս է, որ Օբաման կարո՞ղ է հավատալու կոչ անել, իսկ Սերժ Սարգսյանը՝ ոչ: Պետք է բոլորը հավատան և աշխատեն ինչ-որ բան փոխել, այդ թվում՝ ես: Մենք պետք է լինենք աննկուն, անկոտրում՝ իրականացնելու Սերժ Սարգսյանի նշած գործընթացները»,- ասաց նա:
