Այժմ ՀՀ և ԼՂՀ զինված ուժերում կա 47 հոգևոր սպասավոր, ովքեր զբաղվում են բանակի հոգևոր խնդիրներով: ՀՀ զինված ուժերի քահանա Տեր Կորյուն Կարապետյանը այսօր լրագրողների հետ հանդիպմանը ներկայացրեց հոգևոր սպասավորի դերը բանակում:
Քահանայի խոսքերով՝ հոգևորականը բանակում պետք է ապահովի բարոյահոգեբանական առողջ մթնոլորտ, որպեսզի կորուստներ քիչ գրանցվեն. «Եթե ունենք կորուստ, սա առաջին հերթին մեր մեղքն է, հոգևոր սպասավորի մեղքը: Մեր աշխատանքի շեշտադրումներից մեկը բանակում սեր սերմանելն է, որպեսզի խուսափենք ցավալի դեպքերից»:
Խոսելով աղանդավորների մասին՝ բանախոսն ասաց, որ դրանք բանակում քիչ են, սակայն եղածն էլ բաժանվում էր երկու տիպի. նրանք, ովքեր ընտանիքից են բերում աղանդը, և նրանք, ովքեր համոզված են իրենց կրոնի մեջ:
«Շատերը մի քանի զրույցից հետո ուղղվում են, մի մասն էլ փորձում է ուրիշներին ներքաշել իր կրոնի մեջ: Հոգևորականը այս դեպքում տանում է անհատական աշխատանք»:
Նշենք նաև, որ բանակում կան հիմնական և ժամանակավոր հոգևոր սպասավորներ՝ հիմնականում սահմանամերձ և մեծ զորամասերում:
