Հունվարի 24-ին մեկնարկում է ԵԽԽՎ հունվարյան նստաշրջանը, որի օրակարգում Հայաստանի վերաբերյալ հարց ընդգրկված չէ: ԱԺ եվրաինտեգրման մշտական հանձնաժողովի նախագահ, ԱԺ ԲՀԿ խմբակցության անդամ Նաիրա Զոհրաբյանը լրագրողների հետ հանդիպման ժամանակ ասաց, որ հայաստանյան պատվիրակությունը պատրաստ է ակտիվ աշխատել հունվարյան նստաշրջանում:
Զոհրաբյանը հիշեցրեց, որ 2010-ի նոյեմբերի 10-ից ԵԽ նախարարների կոմիտեի նախագահությունը ստանձնել է Թուրքիան` ի դեմս Թուրքիայի ԱԳ նախարար Դավութօղլուի, «Բոլորիս համար էլ հասկանալի է, որ Դավութօղլու-Չավուշօղլի տանդեմը փորձելու են առաջ մղել թուրք-ադրբեջանական լոբբիի շահերի տիրույթում գտնվող խնդիրները, մասնավորապես տխրահռչակ 1416 բանաձեւով նախատեսված ԼՂ հարցով ժամանակավոր հանձնաժողովի աշխատանքների վերսկսումը»:
Զոհրաբյանը նկատեց, որ հունվարի 28-ին նախատեսված Բյուրոյի նիստի ժամանակ Չավուշօղլուն ամեն ինչ անելու է, որպեսզի ԼՂ հարցով ենթահանձնաժողովը վերսկսի իր աշխատանքները. «Այդ պարագայում ես հայտարարում եմ ԲՀԿ կուսակցության անունից. մենք պետք է բոյկոտենք եւ չմասնակցենք հանձնաժողովի նիստերին: Ես համոզված եմ, որ ԵԽԽՎ հայաստանյան պատվիրակության մյուս անդամները եւս համամիտ են ինձ հետ»:
ԵԽԽՎ հունվարյան նստաշրջանի ընթացքում ելույթ է ունենալու նաեւ Թուրքիայի նախագահ Աբդուլահ Գյուլը: Զոհրաբյանը տեղեկացրեց, որ ինքը հարցեր է ուղղելու թե՛ Գյուլին, թե՛ Դավութօղլուին:
