Նյու Յորքի հեռախոսային կրպակները, որոնք վերջին տարիներին կորցնում են իրենց համբավը, նորովի կկիրառվեն: Դրանք կվերածվեն անվճար մինի-գրադարանների: Այժմ քաղաքացիները կկարողանան կրպակներն օգտագործել ոչ միայն դրանց ուղիղ նշանակությամբ, այլ նաև վերցնել, փոխանակել կամ էլ այնտեղ թողնել իրենց ոչ անհրաժեշտ գրքերը: Դա հնարավոր է դարձել տեղացի ճարտարապետ Ջոն Լոկկի շնորհիվ։ Այս մասին հաղորդում է տեղական մամուլը:
Իր նախագծով Լոկկը զարգացրել է Ջեյմս Իկոնսի գաղափարը, ով Մեծ Բրիտանիայում հեռախոսային կրպակները համալրել էր գրքերի համար նախատեսված համեստ դարակներով:
«Գրադարանի» նյույորքյան տարբերակն ավելի հարմարավետ է. գրականությունը տեղադրելու համար օգտագործվում են վառ նարնջագույն բազմահարկ դարակներ, որոնք կարելի է տեղադրել յուրաքանչյուր կրպակում առանց որևէ լրացուցիչ ամրացման: Այս ամենը նախագծված է այնպես, որ չխանգարի հեռախոսն օգտագործելուն:
«Անգամ եթե հեռախոսային կրպակները հնացած են թվում՝ բջջային հեռախոսների տարածման պատճառով, ես հետաքրքրված եմ դրանցով, քանի որ հանդիպում են ամենուր: Միաժամանակ դրանք արխաիկ են։ Հիմա դրանք պարզապես քաղաքում տեղ են զբաղեցնում, սակայն կարող են օգտագործվել նոր հնարավորությունների իրականացման համար, որպես մի վայր, ուր կարելի է գալ ու կիսվել լավ գրքով»,– հայտարարել է Լոկկը:
