News Georgia-ի փոխանցմամբ՝ փորձագետներից բաղկացած ԵՄ-ի առաքելությունն այսօր ժամանում է Վրաստան՝ քննարկելու համար 2011 թվականի դեկտեմբերի 1-ին կնքված և այս տարվա մարտի 1-ին ուժի մեջ մտած վիզաների ազատականացման և հետընդունման մասին համաձայնագրի իրագործումը: Այս մասին այսօր հայտարարել է Վրաստանի փոխարտգործնախարար Նինո Կալանդաձեն:
Վերջինիս խոսքերով՝ տվյալ խնդիրների շուրջ ԵՄ-ի ու Վրաստանի միջև երկխոսության սկսման գործընթացը կախված է լինելու ԵՄ-ի առաքելության գնահատականներից, ինչի համար էլ իրենք մեծ կարևորություն են տալիս ԵՄ-ի այդ առաքելությանը:
Կալանդաձեն հավելել է, որ ԵՄ-ի ներկայացուցիչների վրացական այցը կտևի մինչև մարտի 14-ը։ Վրաստանում նրանք կանցկացնեն բարձր մակարդակի մի շարք հանդիպումներ, այդ թվում՝ նաև տարբեր գերատեսչությունների աշխատանքային խմբերի ներկայացուցիչների հետ:
Հիշեցնենք, որ ավելի վաղ Վրաստանի արտգործնախարար Գրիգոլ Վաշաձեն հայտարարել էր, որ ԵՄ-ի ու Վրաստանի միջև վիզաների ազատականացման վերաբերյալ երկխոսությունը տեղի կունենա մինչև այս տարվա ամառ:
