«Ազատ դեմոկրատներ» կուսակցությունը առաջադրումներ կանի նաև մեծամասնական ընտրատարածքներում, կլինեն ընտրատարածքներ, ուր կպաշտպանի անկուսակցական թեկնածուների: Այսօր կայացած քննարկման ժամանակ ասաց կուսակցության վարչության նախագահ Խաչատուր Քոքոբելյանը:
Անդրադառնալով «Ժառանգություն» կուսակցության հետ հնարավոր դաշինքին՝ նա տեղեկացրեց, որ բանակցություններն ընթացքի մեջ են, սակայն մարտի 16-ին կայանալիք «Ազատ դեմոկրատներ»-ի համագումարին միասնական համամասնական ցուցակ չի ներկայացվի:
«Ես, որպես «Ազատ դեմոկրատներ»-ի նախագահ, լիահույս եմ և իմ ուժերի սահմաններում կանեմ հնարավորը միասնական դաշինքով հանդես գալու համար: Ավելին՝ անձամբ պատրաստ եմ ցուցակի առաջին տեղը զիջել Րաֆֆի Հովհաննիսյանին: Մենք «Ժառանգության» հետ համատեղ կանենք ամեն բան, որ Հայաստանում նոր արժեհամակարգ ձևավորվի: Ճիշտ աշխատելու դեպքում դա մեզ կհաջողվի»,- ասաց նա:
Քոքոբելյանի խոսքով՝ ինքը երբևիցե չի փորձել մասնակից դառնալ մանդատ ձեռք բերելու գործընթացներին: «Պատճառն այն է, որ պատգամավոր դառնալն ինձ համար ինքնանպատակ չի եղել»,- ասաց նա:
