Ֆրանսիայի նախագահ Նիկոլա Սարկոզին մարտի 11-ին կրկին կոչ է արել բարեփոխել Շենգենյան համաձայնագիրը և սպառնացել է, որ հակառակ դեպքում Ֆրանսիան կարող է դադարեցնել իր մասնակցությունը դրան:
«Անհրաժեշտ է Շենգենի կառուցվածքային բարեփոխումներ անել այնպես, ինչպես արեցինք եվրոյի հարցում»,- հայտարարել է Նիկոլա Սարկոզին` Վիլպենտում ելույթ ունենալով իր կողմնակիցների առջև: Նախագահը, ինչպես նաև նրա կուսակիցները, կանոնավոր անդրադառնում են միգրացիայի հանդեպ վերահսկողությունն ուժեղացնելու հարցին:
Պետության ղեկավարն արդեն մի քանի անգամ կոչ է արել վերանայել Շենգենյան համաձայնագիրը, ուժեղացնել վերահսկողությունը շենգենյան գոտու արտաքին սահմանների վրա և դրա համար ստեղծել հատուկ մեխանիզմներ: «Պետք է պատժամիջոցներ մտցնելու հնարավորություն ունենալ, դադարեցնել անդամությունը կամ էլ Շենգենյան համաձայնագրին ընդհանրապես բացառել այս կամ այն պետությունների մասնակցությունը։ Ճիշտ այնպես, ինչպես կարելի է պատժամիջոցներ կիրառել եվրոգոտու պետությունների հանդեպ, որոնք չեն կատարում իրենց պարտավորությունները»,- ասել է Սարկոզին:
«Եթե մոտակա 12 ամիսների ընթացքում այդ ուղղությամբ լուրջ առաջընթաց չգրանցվի, ապա Ֆրանսիան կարող է դադարեցնել իր մասնակցությունն այնքան ժամանակ, մինչև բանակցությունները հաջողությամբ ավարտվեն»,- սպառնացել է նախագահը, ում խոսքերը մեջբերում է РИА Новости-ն:
