Գազայի հատվածում իսրայելական բանակը մարտական գործողություններ է իրականացնում ընդդեմ Պաղեստինի ծայրահեղական խմբավորումների, որոնք ուրբաթ օրվանից վերսկսել են հրթիռային գրոհները Իսրայելի տարածքում:
ԶԼՄ-ների տեղեկատվության համաձայն՝ BBC իսրայելական ինքնաթիռների հրթիռային հարվածներից մահացել է մոտ 16 մարդ: Ինչպես հաղորդում է Interfax գործակալությունը, Գազայի հատվածում ևս 27 մարդ տարբեր աստիճանի մարմնական վնասվածքներ է ստացել, որոնցից 5-ի վիճակն առավել ծանր է: Իսրայելի տարածքում էլ պաղեստինցիների հրթիռային հարձակումից է տուժել չորս մարդ:
ԱՄՆ վարչակազմը իր անհանգստությունն է հայտնել Իսրայելի և պաղեստինցիների միջև մարտական գործողությունների վերսկսման առնչությամբ և կողմերին կոչ է արել հաստատել խաղաղություն:
«Մենք խիստ քննադատում ենք հարավային Իսրայելի ռմբակոծումը Գազայի պաղեստինցի ահաբեկիչների կողմից, որը վերջին օրերս բավականին ուժեղացել է: Մենք այս գործողությունների պատասխանատուներին կոչ ենք անում անմիջապես դադարեցնել դրանք»,- նախօրեին հայտարարել է ԱՄՆ պետդեպարտամենտի ներկայացուցիչ Վիկտորյա Նյուլանդը:
«Մենք ցավում ենք զոհվածների և վիրավորների համար և երկու կողմերին կոչ ենք անում բոլոր ջանքերը գործադրել` հաստատելու համար խաղաղություն»:
Իսրայելի պաշտպանության բանակի մամլո ծառայությունը հրապարակել է պաղեստինցիների խմբավորման ոչնչացման տեսանյութը, ովքեր նախատեսում էին ռմբակոծել իսրայելական տարածքները;
Ինչպես տեղեկացնում է NEWSruIsrael-ը, տեսանյութում երևում է, թե ինչպես են գրոհայինները մոտենում ցանկապատին, իսկ իսրայելական BBC ինքնաթիռը հրթիռ է բաց թողնում նրանց ուղղությամբ: Երկու ահաբեկիչներ մահանում են, իսկ երրորդը, հավանաբար, ողջ է մնում, քանի որ նա կանգնած էր ավտոմեքենայի մոտ:
