Թուրքական Dünya Bülteni կայքի փոխանցմամբ՝ թուրքական իշխանությունները երկրում ահաբեկչական հռչակված ու արգելված Քրդստանի աշխատավորական կուսակցության (PKK) առաջնորդների ձերբակալությանը նպաստելու համար խոշոր գլխագներ են սահմանել:
Ընդհանուր առմամբ, Թուրքիայի ՆԳՆ-ի ցանկում ընդգրկվել են PKK-ի 50 առաջնորդներ ու ազդեցիկ անձինք, որոնցից 20-ը գտնվում են Եվրոպայում: Նրանցից ամեն մեկի համար սահմանվել են տարբեր գլխագներ՝ 100,000 թուրքական լիրայից (ավելի քան 56,500 դոլար) սկսած մինչև 4 միլիոն թուրքական լիրա (2,265,000 դոլար):
Այդ ցանկը սկսվում է PKK-ի հիմնադիր Աբդուլլահ Օջալանի կալանքի տակ գտնվելու պայմաններում PKK-ի փաստացի առաջնորդ Մուրադ Քարայըլանով, Ջեմիլ Բայըքով, Սաբրի Օքով և Ֆեհման Հուսեինով: Այս քառյակից յուրաքանչյուրի համար սահմանվել է առավելագույն գլխագին:
Նշանակված գլխագների մասին տեղեկատվությունը տարածվելու է թռուցիկների, ռադիոյի և հայտարարությունների միջոցով: Այդ ամենը գերազանցապես իրականացվելու է Թուրքիայի հարավարևելյան քրդաբնակ շրջաններում և Իրաքի հյուսիսում, ուր գտնվում են PKK-ի ճամբարներն ու բազաները:
Հիշեցնենք, որ նախորդ տարվա դեկտեմբերի վերջին թուրքական Today’s Zaman թերթը գրել էր, թե Թուրքիայի կառավարությունը նոր ռազմավարություն է մշակել PKK-ի դեմ։ Խոսքը PKK-ի մոտ 300 առավել հեղինակավոր գործիչներին ու դաշտային հրամանատարներին ֆիզիկապես ոչնչացնելու մասին է։ Այդ նպատակով կազմվել է հատուկ «մահվան ցուցակ»։ Այս ռազմավարության հեղինակը Թուրքիայի ներկայիս ներքին գործերի նախարարն է՝ Իդրիս Նաիմ Շահինը։
Որպես նման ռազմավարություն ընտրելու պատճառ է նշվում այն, որ թուրքական բանակի և ժանդարմերիայի հետ բախումներում հիմնականում զոհվում են շարքային PKK-ականները, որոնց զոհվելու հանգամանքը PKK-ի վերնախավն օգտագործում է իր հակաքարոզչական նպատակների համար։ Օրինակ՝ PKK-ն վստահեցնում է, որ թուրքական կառավարությունը քրդաբնակ շրջաններում յուրաքանչյուր տնից սպանել է առնվազն մեկ մարդու։
PKK-ի երիտասարդ շարքային ակտիվիստների զոհվելն է՛լ ավելի է ամրապնդում քրդերի ատելությունն Անկարայի հանդեպ։ Դրա համար էլ վճռվել է գլխատել PKK-ն:
