ԱՄՆ իշխանությունները տեղեկություններ ունեն, որ Սիրիայից դուրս է բերվում խոշոր դրամական միջոցներ, իսկ կառավարող վերնախավի ներկայացուցիչները տեղափոխվում են հարևան երկրներ: Այս մասին լրագրողների հետ ճեպազրույցում հայտարարել է ԱՄՆ պետքարտուղարության մամուի ծառայության ղեկավար Վիկտորյա Նուլանդը:
«Մենք տեսնում ենք՝ ինչպես են Սիրիայից գնալով ավելի շատ դրամական միջոցներ դուրս բերվում: Մենք տեսնում ենք, որ (բարձրաստիճան.- 1in.am) ընտանիքների անդամները տեղափոխվում են Լիբանան, Հորդանան, Թուրքիա և այլ հարևան երկրներ»,- ասել է գերատեսչության պաշտոնական ներկայացուցիչը: Նրա խոսքերով՝ դա առաջին քայլն է , երբ նախկինում վարչակարգին աջակցող մարդիկ սկսում են հասկանալ, որ Ասադի վերջը մոտենում է:
Նուլանդը սակայն հրաժարվել է նշել երկրից դուրս եկած բարձրաստիճան անձանց անունները՝ պատճառաբանելով, որ ԱՄՆ-ն առաջնորդվում է անձնական կյանքի անձեռնմխելիության իրավունքով:
«Երբ այդպիսի բաներ են սկսվում, դրանք ընդլայնման միտում են ունենում»,- ընդգծել է Նուլանդը: Բացի այդ, ըստ նրա տեղեկության՝ Սիրիայի զինված ուժերում վերջին շրջանում ավելացել է դասալիքների թիվը, որոնք հիմնականւմ շարքայինների կամ սերժանտների դասից են լինում:
Ինչպես գրում է Washington Post թերթը, ամերիկյան հետախուզությունը տեղեկություն ունի, որ Սիրիայի իշխող վերնախավին պատկանող միլիանավոր դիոլարներ դուրս են բերվում երկրից և տեղափոխվում արտասահմանյան հաշվեհամարների: Այնուամենայնիվ, ԱՄՆ հատուկ ծառայությունները խոստովանում են, որ չեն կարող նշել այդ գումարների չափը կամ հետևություն անել՝ արդյո՞ք դա կապված է Սիրիայի կառավարող վերնախավի պառակտման հետ:
