ԿԸՀ-ում լրագրողների հավատարմագրման կարգը միջամտություն է ազատ խոսքի իրավունքին: «Առաջին լրատվական»-ի հետ զրույցում նման տեսակետ հայտնեց իրավապաշտպան Արտակ Զեյնալյանը`անդրադառնալով ԿԸՀ-ում լրագրողների հավատարմագրման կարգին:
Նա կարծում է, որ դատական ակտով անգործունակ ճանաչված լինելու հանգամանքը նորմալ է. եթե լրագրողն անգործունակ է ճանաչվել, նորմալ է, որ չի հավատարմագրվի: «Իսկ մնացած նախապայմանները միջամտություն է ազատ խոսքի իրավունքին, արտահայտվելու ազատության իրավունքին և հակասում է Մարդու իրավունքների եվրոպական կոնվենցիային, հետևաբար նաև ՀՀ սահմանադրությանը»,- մեկնաբանեց Ա. Զեյնալյանը`հավելելով, որ նման սահմանափակումներն ու արգելքները կարող են սահմանվել բացառապես օրենքով և եթե օրենքով, Ընտրական օրենսգրքով, խոսքի ազատության մասին օրենքներով հավատարմագրման համար նման սահմանափակումներ նախատեսված չեն, ապա ԿԸՀ-ն իրավասու չէր նման կարգ սահմանելու: Իրավապաշտպանի համոզմամբ` դա հակասում է օրենքին, սահմանափակում է մարդու սահմանադրական իրավունքը:
Հիշեցնենք, որ ԿԸՀ-ի՝ լրագրողների հավատարմագրման կարգի մասին որոշման համաձայն՝ կհավատարմագրվեն այն լրագրողները, որոնք դատական կարգով անգործունակ չեն ճանաչվել, դիտավորյալ հանցագործության համար չեն դատապարտվել և ընտրական հանձնաժողովների, պաշտոնատար անձանց գործունեության մասին չեն տարածել այնպիսի տեղեկություններ, որոնք չեն համապատասխանում իրականությանը:
