«Պատգամավորական նախորդ ընտրություններում Գրողների միության նախագահ Լևոն Անանյանն առաջադրվել էր իր հայրենի Նոյեմբերյանում, որտեղ նրա մրցակիցն էր «Գրանդ հոլդինգ»-ի սեփականատեր Միքայել Վարդանյանը: Այլ թեկնածուներ ևս կային, և սուր մրցակցության արդյունքում ընտրվեց Վարդանյանը, իսկ Անանյանը կրքոտ հարցազրույցներ էր տալիս ու հայտնում, որ այդ հաղթանակը տոնվեց ընտրախախտումների շնորհիվ»,- գրում է «Հրապարակ»-ը և հավելում.
«Այս ընտրություններում Միքայել Վարդանյանը կրկին առաջադրվում է, իսկ Լևոն Անանյանը նահանջել է.
-Պարոն Անանյան, 2012 թվականի խորհրդարանական ընրություններում առաջադրվելու մտադրություն չունե՞ք: Չէ՞ որ նախկին ընտրություններում ջանք չէիք խնայում խորհրդարանում հայտնվելու համար:
– Ոչ, ես գրականության մեջ այնքան եմ մխրճված, որ քաղաքականության համար ժամանակ չունեմ:
-Իսկ այն ժամանակ ինչո՞վ էիք զբաղված:
– Այն ժամանակ ջահել էի, և այդքան ծանրաբեռնվածություն չկար: Ես հիմա ունեմ իմ առաքելությունը, ծրագրերը, որոնք նախաձեռնել ենք Գրողների միությունում, պետք է հասցնել ավարտին:
-Պարոն Անանյան, սովորաբար մտավորականները նախընտրական շրջանում ընդգրկվում են այս կամ այն քաղաքական ուժի քարոզարշավի խմբում: Դուք որի՞ն եք նախապատվությունը տալու:
-Ես Գրողների միության նախագահն եմ, որտեղ գրական համայնքն է, որի մեջ քաղաքական տարբեր ուժերին համակրող անհատներ են ներգրավված: Ես պետք է ավելի զուսպ լինեմ էն առումով, որ չքաղաքականացնեն: Մեր մոտ այդպես ա, չէ՞, եթե որևէ կառույցի ղեկավար սատարում ա որևէ քաղաքական կառույցի, արդեն կարծիք ա ստեղծվում, թե նա էլ թելադրում ա սատարել այս կամ այն քաղաքական ուժին: Կարծում եմ՝ իմ ձայնը կամ խոսքն այնքան էական չի, որ ես գնամ հրապարակային…
-Բայց եթե կառույցի ղեկավար եք, արդեն նշանակում է, որ գործող իշխանության սատարողն եք: Այդպիսին է տպավորությունը:
-Եթե մեկն ասում ա՝ ինձ թվում ա, ուրեմն իրա տեղը հոգեբուժարանն ա, ես որևէ մեկից ոչ վախենում եմ, ոչ էլ ունեմ որևէ բարդույթ՝ ասելու ճշմարտությունը: Իշխանություն ա, ընդդիմություն ա, եթե նրա քաղաքական ծրագիրն ինձ համար գերադասելի լինի, ոչ «Հրապարակին» պիտի հարցնեմ, ոչ էլ որևէ մեկին: Յուրաքանչյուրն իր կյանքն է ապրում: Ունենք մեր ձայնի իրավունքը: Ես կարծում եմ, որ չի հասունացել էն պահը, որ ես ընտրություն պիտի անեմ, թե որևէ մեկի կողքին կանգնեմ, թե չէ:
-Չե՞ք հայտարարելու, որ սատարում եք Սերժ Սարգսյանին:
-Այ քեզ բան…. Հիմի ինչ ա… էն բան ունեինք՝ փիլիսոփայության դասախոս, հանգուցյալն ասում էր, սպասեք, թռեք, նոր հոպ արեք: Երբ գա ժամանակը, էն ժամանակ էլ կխոսենք:
-Վարդանյանների հետ ինչպե՞ս են Ձեր հարաբերությունները: Ընտրությունների ժամանակ շատ լարված էիք:
-Վարդանյանները հաղթեցին այն ժամանակ… և ընդհանրապես ես օլիգարխների հետ հարաբերությունների ժամանակ չունեմ, հատուկ ջանք-բան… Ես դրական եմ վերաբերվում նրանց ներդրումներին գործարար աշխարհում:
-Երբ Միքայել Վարդանյանի մրցակիցն էիք, հայտարարում էիք, որ ընտրակաշառքով է վերջինս Աժ պատգամավոր ընտրվել:
-Ես նման հայտարարություն չեմ արել, որովհետեւ չեմ տեսել, որ որևէ մեկը որևէ մեկին կաշառք տա: Դա ժամանակին բոլորն էին խոսում, և ես չգիտեմ որևէ անգամ Հայաստանում ընտրություն, որտեղ կաշառքը բաղկացուցիչ չլինի: Բայց որ ես անձամբ հայտարարեմ, թե Վարդանյանները տվել են կաշառք, ես տեսել եմ, էդ մեկը հորինովի ա:
