Բրիտանական Express պարբերականի տեղեկացմամբ Մադրիդի «Ռեալ»-ի գլխավոր մարզիչ Ժոզե Մոուրինյոն Լոնդոնի «Չելսի»-ի ղեկավարությանը ներկայացրել է այն պահանջները, որոնց կատարման դեպքում միայն ինքը կվերադառնա Անգլիա։ Մասնագետը պահանջում է 12 մլն ֆունտ տարեկան աշխատավարձ և «արքայական ակումբ»-ի առաջատար Քրիշտիանու Ռոնալդուի տրանսֆերի ձեռքբերում։
Պարբերականի տեղեկացմամբ «արիստոկրատներ»-ի ղեկավարությունը պատրաստ է կատարել պորտուգալացու պահանջները և վերջինիս վերադարձնել «Չելսի»։
Պեպ Գվարդիոլան ու Յոահիմ Լյովն, ամենայն հավանականությամբ, կմերժեն լոնդոնյան ակումբի առաջարկը։ Իսպանացին ցանկանում է 1 տարով ընդմիջել իր մարզչական կարիերան, իսկ Գերմանիայի ֆուտբոլի միությունը նոր պայմանագիր կառաջարկի Լյովին։
Բրիտանական The Sunday Times թերթն ավելի վաղ տեղեկացրել էր, որ Ժոզեն ընթացիկ մրցաշրջանի ավարտից հետո Պիրենեյան թերակղզուց հեռանալու վերջնական որոշում է կայացրել։ «Ռեալ»-ի հետ Մոուրինյոյի պայմանագրի ժամկետը լրանում է 2014 թվականին։ Համաձայնագրի՝ ժամկետից շուտ խզման դեպքում պորտուգալացի մասնագետը Լա Լիգայի գործող առաջատարին կվճարի 20 մլն եվրո։
