Լոնդոնի ֆոնդային բորսայի AIM շուկայում ընդգրկված «Էսչեր Գրուփ» ընկերությունը (Escher Group) տեղեկացնում է, որ վերջերս «Էսչերը» շահել է ԱՄՆ-ի փոստի հայտարարած 50 միլիոն դոլար արժողությամբ մրցույթը, որով ընկերությունն իր «Riposte» ծրագրային ապահովումը կներդնի աշխարհի խոշորագույն փոստային օպերատոր ԱՄՆ-ի փոստային ցանցում (USPS). «Էսչեր Գրուփ»-ն իր հայտարարության մեջ նշում է, որ ԱՄՆ-ի փոստի հետ պայմանագիրը «հաջորդում է դեկտեմբերին Հայաստանի փոստային կապի օպերատոր «Հայփոստ»-ի և հունվարին Սաուդյան փոստի հետ կնքված պայմանագրերին»:
Էսչերի ներկայացուցիչները և արգենտինացի ու հայ մասնագետների խումբը ներկայումս իրականացնում են Հայաստանի փոստային կապի ազգային օպերատոր «Հայփոստ»-ի ցանցում «Ripost Essential» ծրագրային ապահովման տեղադրումը:
«Հայփոստ»-ից «Առաջին լրատվական»-ին հայտնեցին, որ այս առիթով փետրվարի վերջին համատեղ հանդիպում տեղի ունեցավ «Էսչեր Գրուփ»-ի ծրագրի ղեկավար Բիժու Ջորջի և «Հայփոստի» ներկայացուցիչների` «Հայփոստ թրասթ մենեջմենթ»-ի կառավարող տնօրեն Խուան Պաբլո Գեչիջյանի, «Հայփոստ» ՓԲԸ գործադիր տնօրենի պաշտոնակատար Հայկ Ավագյանի, զարգացման ծրագրի ղեկավար Ֆաբիան Օտերոյի և այլոց միջև:
Այս բեկումնային տեխնոլոգիայի կիրառումն ամբողջովին կփոխի Երևանից մինչև Հայաստանի ամենահեռավոր գյուղերը ձգվող փոստային ցանցի արդյունավետության մասին պատկերացումները:
Հիշեցնենք, որ Հայաստանի փոստային կապի ազգային օպերատոր «Հայփոստ»-ի և «Էսչեր Գրուփ»-ի միջև կնքված 1.5 միլիոն դոլար արժողությամբ պայմանագրի համաձայն` 2012 թ. ընթացքում Էսչերը իր «Riposte Essential» ծրագրային ապահովումը կներդնի «Հայփոստ»-ի ամբողջ փոստային ցանցում:
