Եվրոգոտին այս պահին գտնվում է «փափուկ ռեցեսիայի» վիճակում: Այսպիսի հայտարարություն է արել տնտեսական հարցերով եվրահանձնակատար Օլլի Ռենը:
Ինչպես հաղորդում է Agence France-Presse-ը՝ վկայակոչելով Եվրոստատի մամլո ծառայությունը, 2011թ. վերջին քառորդում եվրոգոտու, ինչպես և ԵՄ-ի ՀՆԱ-ն, նվազել է 0.3%-ով՝ համեմատած հուլիս-օգոստոս ամիսների արդյունքների հետ: Այսպիսով, անցյալ տարվա արդյունքում ԵՄ տնտեսությունն աճել է 1.5%-ով, եվրոգոտունը՝ 1.4%-ով:
2011թ. չորրորդ քառորդի վերանայված տվյալների համաձայն՝ ռեցեսիայի վիճակում են գտնվում Բելգիայի, Նիդեռլանդների, Չեխիայի, Իտալիայի, Պորտուգալիայի, Սլովենիայի և Հունաստանի տնտեսությունները:
Հունվարի վերջին Եվրահանձնաժողովը կանխատեսում էր եվրոգոտու ռեցեսիա, որն արդեն երկրորդն է վերջին երեք տարիների ընթացքում: Այդ ժամանակ վերլուծաբանները նշում էին, որ եվրոգոտու տնտեսական զարգացումը կանգ է առել 2011թ. վերջին: Նրանց կարծիքով՝ բացասական միտումները կպահպանվեն նաև այս տարվա ընթացքում:
