Ադրբեջանական APA լրատվական գործակալության փոխանցմամբ՝ Ռուսաստանն ու Ադրբեջանը մոտ են Ադրբեջանի տարածքում գտնվող և Ռուսաստանի կողմից վարձակալված Գաբալայի ռադիոտեղորոշիչ կայանի (ՌՏԿ) պայմանագրի երկարաձգման մասին բանակցություններն ավարտելուն: Այս մասին այսօր տեղի ունեցած ճեպազրույցի ժամանակ հայտարարել է Ռուսաստանի փոխարտգործնախարար Սերգեյ Ռյաբկովը:
Վերջինիս խոսքերով՝ ներկայիս դրությամբ կողմերը ավելի մոտ են բանակցությունների ավարտին, քան՝ նախկինում: Նա հավելել է, որ թեև գրանցվել է առաջընթաց, այնուամենայնիվ դեռ չկարգավորված են մնում վարձավաճարի և վարձակալության պայմանների մի շարք կետեր:
Հիշեցնենք, որ նախորդ շաբաթ Коммерсант-ը գրել էր, որ Ադրբեջանը պահանջել է Գաբալայի ՌՏԿ-ի տարեկան վարձավճարն ավելացնել մոտ 43 անգամ՝ 7 միլիոն դոլարից հասցնելով 300 միլիոն դոլարի:
Ի դեպ, Գաբալայի ՌՏԿ-ի վարձակալության համաձայնագիրը Ռուսաստանի ու Ադրբեջանի միջև կնքվել է 2002 թվականին: Դրա ժամկետն ավարտվում է 2012 թվականի դեկտեմբերի 24-ին:
