CNN Türk-ի փոխանցմամբ՝ այսօր առավոտյան Թուրքիայում մեկնարկել է «Քրդական համայնքների միության» (KCK) գործի շրջանակներում ընթացող ձերբակալությունների հերթական ալիքը: Հիշեցնենք, որ KCK-ն համարվում է Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) քաղաքացիական թևը:
Ստամբուլում ոստիկանության ահաբեկչության դեմ պայքարի բաժանմունքի աշխատակիցները ձերբակալել են մի քանի մարդու: Ավելի խոշոր գործողություն է իրականացվել Ադանայում, ուր դրան մասնակցել է մինչև 500 ոստիկան: Ադանայում KCK-ի գործով ձերբակալվել է ավելի քան 30 մարդ:
Թուրքական ոստիկանությունը կարծում է, որ PKK-ն ցանկանում է Ադանան վերածել իր «գաղտնի որջի»:
Հիշեցնենք, որ ավելի վաղ թուրքական ԶԼՄ-ները հայտնել էին, թե PKK-ն պլանավորել է մինչև Նովրուզ մի շարք արյունալի գործողություններ իրականացնել Թուրքիայի ողջ տարածքում:
Այդ նպատակով PKK-ն Թուրքիա է գործուղել իր 50 ներկայացուցչի, որոնք նախապես 3 շաբաթ շարունակ «ռմբային կրթություն» են ստացել Ղանդիլում (Հյուսիսային Իրաք): Դրա հետ կապված` Թուրքիայի անվտանգության ուժերում հայտարարվել է «կարմիր տագնապ»:
Ի դեպ, փետրվարի կեսերին քրդական «Խաղաղություն և ժողովրդավարություն» կուսակցության (ԽԺԿ) համանախագահ Սելահաթթին Դեմիրթաշն հայտարարել էր, որ չի հասկանում, թե որն է այդ ձերբակալությունների պատճառը՝ ընդգծելով, որ դրանք մեկնարկել են 2009 թվականի ապրիլի 19-ին: Ըստ Դեմիրթաշի՝ KCK-ի գործի շրջանակներում Թուրքիայում ձերբակալվել է 6300 մարդ, որոնցից 1069-ը՝ այս տարի:
