Ռուսաստանում իշխանության է գալիս մի փոքր ուրիշ՝ ավելի փորձառու և ավելի չար Պուտինը, ով գիտակցում է, որ ավելի մեծ աջակցություն է վայելում, որ ավելի իրական ու հզոր ընդդիմություն ունի. այդ է պատճառը, որ նա պետք է արդյունքներ ցույց տա և որքան հնարավոր է շուտ՝ տնտեսության, արտաքին քաղաքականության ոլորտներում: «Առաջին լրատվական»-ի հետ զրույցում նման տեսակետ հայտնեց քաղաքագետ Իգոր Մուրադյանը:
«Պուտինն արդեն իսկ հայտարարել է, որ ԱՊՀ-ն առաջնահերթություն է: Եվրասիական միությունը այդ ծրագրի մի մասն է: Կարծում եմ՝ հակազդեցությունը կաճի և Արևմուտքի, և մահմեդական պետությունների կողմից: Ռուսաստանի էքսպանսիային դիմակայելու համար ԱՄՆ-ը կանի ամեն բան: Սակայն մեծ էքսպանսիա չի ստացվի: Պուտինը հասկանում է, որ Ռուսաստանը չի կարողանա հետխորհրդային երկրների սահմանից այն կողմ տարածել իր ազդեցությունը: Դրա համար էլ խնդիրը բավական համեստ է դրված՝ Ռուսաստանի ազգային անվտանգության նպատակով իր համար գործընկերներ և համախոհներ ստեղծել: Միաժամանակ, նույնիսկ այս համեստ խնդիրը լուծվելու է մեծ դժվարությամբ: Մեծ խնդիրներ են լինելու Կովկասում, Սև ծովում և Կենտրոնական Ասիայում: Խնդիրներից մեկն էլ մնալու է Ուկրաինան: Երկրի ներսում, ամենայն հավանականությամբ, ձավորվելու է ընդդիմադիր ուժերի մի հզոր բլոկ: Հնարավոր է՝ այդ բլոկը միավորի աջերին, ձախերին ու լիբերալներին և հովանավորվի դրսից: Խնդիրները, մի խոսքով, շատ են լինելու»,- նկատեց քաղաքագետը:
Անդրադառնալով Հայաստանի հետ Ռուսաստանի հետագա հարաբերություններին՝ Իգոր Մուրադյանը նշեց, որ մեր երկիրը մնալու է նրա շատ կարևոր գործընկերը: «Եկել է ժամանակը՝ հասկանալու, որ Հայաստանը շատ ավելին պետք է պահանջի Ռուսաստանից: Մենք համարյա ոչ մի բան չենք վերցրել հայ-ռուսական համագործակցությունից, այլ միայն տվել ենք: Մեր ամենագլխավոր խնդիրը Ռուսաստանի առաջ հարց դնելն է, որ այլևս չի կարելի զինել Ադրբեջանին, որ չի կարելի այդ երկրին ռուսական ռազմական տեխնիկա մատակարարել, բավական է: Միաժամանակ, շատ բան կախված կլինի Թուրքիայի ու Ադրբեջանի հետ առավել սերտ հարաբերություններ հաստատելու Ռուսաստանի փորձերից: Սակայն հիմա հույսեր չկան, որ Ռուսաստանն այդ երկրների հետ էական ինչ-ինչ սկզբունքային հարցերի շուրջ պայմանավորվածություններ ձեռք կբերի: Եվ Թուրքիան, և Ադրբեջանը ԱՄՆ ազդեցության ներքո են»,- նկատեց քաղաքագետը:
