Թուրքական Cihan լրատվական գործակալության փոխանցմամբ՝ երեկ Ստամբուլի Բեյօղլու թաղամասում տեղի է ունեցել բողոքի ակցիա՝ ի հակակշիռ փետրվարի 26-ին Ստամբուլի Թաքսիմ հրապարակում տեղի ունեցած խիստ հակահայկական, ազգայնամոլական և ֆաշիստական ցույցի:
Երեկվա ցույցի մասնակիցները հայտարարել են, որ իրենք չեն ատում հայերին և դատապարտում են ռասիզմը: Ցուցարարները հանդես են եկել «Կեցցե՛ ժողովուրդների բարեկամությունը», «Ո՛չ ֆաշիզմին», «Թուրքը թուրքից բացի այլ բարեկամ էլ ունի», «Ատելությունը՝ ձեզ, մարդկությունը՝ մեզ», «Ո՛չ ռասիզմին» կարգախոսներով:
Ցուցարարները երթով շարժվել են դեպի Թաքսիմ հրապարակ: Նրանք պայմանավորվել են մարտի 13-ին հանդիպել Անկարայում:
