Սգացող մայրը Facebook-ին որակել է «անսիրտ» այն բանից հետո, երբ ընկերությունը մերժել է թույլ տալ, որ նա մուտք գործի իր մահացած դստեր էջը:
Daily Mail-ը գրում է, որ երբ Լուիս Փալմերի 19-ամյա աղջիկը մահացել է ուղեղի քաղցկեղից, կինը սարսափելի վիճակում է հայտնվել, բայց ինքն իրեն մխիթարել է նրանով, որ կարող է մտնել սոցիալական կայքում աղջկա էջը և կարդալ նրա հին հաղորդագրություններն ընկերների հետ` այդ կերպ հիշելով ժպտացող ու աշխույժ աղջկան:
Սակայն 4 շաբաթ առաջ տիկին Փալմերը պարզել է, որ այլևս չի կարող օգտվել դստեր էջից, և երբ այդ մասին հարց է ուղղել ընկերությանը, նրան պատասխանել են, որ այդպես փորձում են պահպանել նրա դստեր անձնական տվյալների գաղտնիությունը:
47-ամյա կինն ասում է որ չի կարողանում հավատալ, որ Facebook-ն այդքան «անսիրտ է»: Իր դուստրը երբեք իրենից գաղտնիքներ չի ունցել և նրա կյանքի վերջին ամիսներին, երբ աղջիկն արդեն զրկված է եղել խոսելու ունակությունից, մայրն է ղեկավարել սոցիալական ցանցի նրա էջը:
Facebook-ի ներկայացուցիչը կատարվածի վերաբերյալ ասել է, որ երբ իրենք իմանում են, որ օգտատերը մահացել է, սահմանափակում են այն մարդկանց թիվը, ովքեր կկարողանան տեսնել նրա էջը, որպեսզի պահպանեն հանգուցյալի հիշատակի նկատմամբ հարգալից վերաբերմունքը: Բայց նա նաև ասել է, որ եթե մահացածի հարազատները դիմեն ընկերությանը, ապա իրենք կարող են ապակտիվացնել այդ էջը:
