«Արդեն տեղեկացրել ենք, որ ՀՀ ԿԳՆ լեզվի պետական տեսչության պետի պաշտոնի համար կպայքարեն երկու թեկնածու: Թափուր պաշտոնի մրցույթին մասնակցելու համար հենց այդքան մարդ է դիմում ներկայացրել քաղծառայության խորհուրդ»,- գրում է «ՀԺ»-ն և հավելում.
«Թե ովքեր են նշված պաշտոնի հավակնորդները, ՔԾԽ-ից չէին հայտնել` պատճառաբանելով թեկնածուների նկատմամբ հնարավոր ինչ-ինչ ճնշումները: Մենք, սակայն, գրել էինք, որ ըստ որոշ տեղեկությունների, դիմում ներկայացնողներից մեկը Սերգո Երիցյանն է: Ինչպես հայտնի է, նա 2010 թվականից ղեկավարում է Լեզվի պետական տեսչությունը` պետի ժամանակավոր պաշտոնակատարի կարգավիճակով: Եվ ահա երեկ տեղեկացանք, որ երկրորդ թեկնածուն նույն տեսչության պետի տեղակալ Մարինե Հովյանն է»:
Վերջինս թերթի հետ զրույցում հաստատել է այս տեղեկությունը և նշել, որ մրցույթում հաղթելու իր շանսերը լավ է գնահատում:
«Իսկ ահա Սերգո Երիցյանից դարձյալ չհաջողվեց հաստատում կամ հերքում ստանալ իր հնարավոր մասնակցության վերաբերյալ: Երեկ էլ, ինչպես արդեն որերորդ անգամ, լսելով, որ իրեն դիմողը «Հայկական ժամանակից» է, նա առաջարկեց զանգահարել ավելի ուշ և այլևս չպատասխանեց հեռախոսազանգին: Ըստ որոշ լուրերի, սակայն, Սերգո Երիցյանին գործազուրկ դառնալու վտանգ է սպառնում: Այդպիսի նպատակ, ըստ նույն լուրերի, ունի ԿԳ նախարար Արմեն Աշոտյանը: Լեզվի պետական տեսչության պետի թափուր պաշտոնի մրցույթը կկայանա մարտի 13-ին»:
