«Հայաստան» համահայկական հիմնադրամը մարտի 1-ին Հրայր և Մարթա Ալբարյանների անվան կրթաթոշակ և դիպլոմ է շնորհել Երևանի պետական կոնսերվատորիայի «Լավագույն ուսանող-2011» ճանաչված վոկալիստ Արսեն Ստեփանյանին:
Ծրագիրը հովանավորում են հիմնադրամի արգենտինահայ բարերարներ Հրայր և Մարթա Ալբարյանները:
Բարերար ամուսինների սահմանած ամենամյա անվանական կրթաթոշակը` 500 ԱՄՆ դոլարին համարժեք ՀՀ դրամ և դիպլոմ, հիմնադրամը շնորհում է 2009 թվականից առաջադեմ ու շնորհալի ուսանողներին սատարելու նպատակով: Այն 2009 թվականին շնորհվել է ջութակահարուհի Մերի Խոջայանին, 2010-ին`սաքսոֆոնահար Դավիթ Մելքոնյանին, 2011-ին` ջութակահարուհի Աննա Մարգարյանին:
Արսենը Կոնսերվատորիայի վոկալ-տեսական ֆակուլտետի, ակադեմիական երգեցողության բաժնի չորրորդ կուրսի ուսանող է: 2010թ. մասնակցել է Դելֆյան խաղերին և արժանացել «Ակադեմիական երգ» անվանակարգում 1-ին կարգի մրցանակի «Ոսկե մեդալի», իսկ 2011թ. դարձել է 2-րդ հանրապետական մրցույթի դափնեկիր:
«Այս գումարն ինձ կօգնի մասնակցել մարտին Մոսկվայում կայանալիք Մ. Մագամաևի անվան միջազգային երգի մրցույթին: Մեծ ակնկալիքներով այս տարի մասնակցում եմ նաև ՀՀ նախագահի երիտասարդական մրցանակ 2011 մրցույթին»,- իր առաջիկա ծրագրերի մասին պատմել է Արսենը: Այս մասին «Առաջին լրատվականին» հայտնում է «Հայաստան» համահայկական հիմնադրամի լրատվական ծառայությունը:
