Եթե Վաշինգտոնը հրաժարվի չեղյալ համարել Ջեքսոն-Վեննիկի համաձայնագիրը, դա ավելի շատ կվնասի ամերիկացիներին, քան կօգնի Ռուսաստանում մարդու իրավունքների ամրապնդմանը: Նման հայտարարություն է արել ԱՄՆ պետքարտուղար Հիլարի Քլինթոնը:
«Ուղղումը չեղյալ համարելը պետք է դառնա Կոնգրեսի առաջնային խնդիրներից մեկը, և դա պետք է անել՝ նախքան Ռուսաստանը պաշտոնապես կդառնա Առևտրի համաշխարհային կազմակերպության (ԱՀԿ) անդամ: Այդ ամենը օգուտ կբերի ամերիկյան բիզնեսին: Մենք Կոնգրեսից սպասում ենք, որ այն դրական կքվեարկի ուղղումը չեղյալ համարելու հարցում»,- ասել է Քլինթոնը՝ ելույթ ունենալով ԱՄՆ Կոնգրեսի Ներկայացուցիչների պալատի միջազգային կոմիտեի լսումներին:
Ինչպես հաղորդում է RIA Novosti-ն՝ նրա խոսքերով՝ ամերիկյան վարչակազմը համոզված է, որ այդ բոլոր միջոցառումները համապատասխանում են ԱՄՆ ազգային շահերին և կհանգեցնեն ռուս-ամերիկյան առևտրի աճին, երկու երկրների միջև տնտեսական հարաբերությունների ամրապնդմանը և դրական կանդրադառնան տնտեսության վրա:
«Որպեսզի մեր ֆերմերները, աշխատողները և գործարարներն առավելագույն օգուտ ստանան ԱՀԿ-ին Ռուսաստանի անդամակցությունից, մենք պետք է բնականոն մշտական առևտրական կապեր հաստատենք Ռուսաստանի հետ՝ առանց որևէ նախապայմանի»,- ասել է Քլինթոնը:
Ջեքսոն-Վեննիկի ուղղումն ընդունվել է ԱՄՆ-ում 1974 թ. և նախատեսում է սահմանափակել առևտուրը մի շարք երկրների հետ, որոնք արգելում են իրենց քաղաքացիների մուտքը ԱՄՆ: Դա առաջին հերթին վերաբերում էր ԽՍՀՄ-ին: Սահմանափակումներով մասնավորապես նախատեսվում էր հատուկ հարկ սահմանել ԱՄՆ-ից ներմուծվող ապրանքների վրա:
ԽՍՀՄ փլուզումից հետո ԱՄՆ-ը չեղյալ համարեց այդ ուղղումը մի շարք նախկին խորհրդային հանրապետությունների նկատմամբ, սակայն Ռուսաստանի դեպքում մինչ օրս այն գործում է: ԱՄՆ նախագահն ամեն տարի կասեցնում է այն ռուս-ամերիկյան առևտրական հարաբերություններին չվնասելու համար:
