Էդուարդ Նազարովի «Կար չկար մի շուն» անիմացիոն ֆիլմը գլխավորել է ռուսական վերջին հարյուր տարիների մուլտֆիլմերի «Ոսկե հարյուրյակը»: Այս մասին հայտարարվել է Սուզդալում կայացած անիմացիոն ֆիլմերի XVII բաց փառատոնի բացման հանդիսավոր արարողության ժամանակ,- տեղեկացնում է РИА Новости-ն:
Ռուսական անիմացիայի 100-ամյակի կապակցությամբ անիմացիայի ոլորտի 100 պրոֆեսիոնալ կինոգործիչներ, նկարիչներ և քննադատներ կազմել են 100 լավագույն մուլտֆիլմների իրենց վարկանիշային ցուցակը: Ընդհանուր առմամբ, նշվել է 600 մուլտֆիլմ, իսկ լավագույն 100-ը հայտարարվել են փառատոնի ժամանակ:
Էդուարդ Նազարովի «Կար չկար մի շուն»-ը գլխավորել է վարկանիշային ցուցակը և ստացել հատուկ մրցանակ: 2-րդ տեղում է հայտնվել «Ոզնին մառախուղի մեջ» մուլտֆիլմը, իսկ 3-րդը «Վինի Թուխն» է:
Ընդհանուր առմամբ, փառատոնն անցել է առանց անակնկալների, ցուցակում հայտնվել են ամենահայտնի մուլտֆիլմները՝ «Ալվան ծաղիկը», «Մի հանցագործության պատմություն», «Փոքրիկն ու Կարլսոնը» և այլն:
Անիմացիոն ֆիլմերի բաց փառատոնը առաջին անգամ անցկացվել է 1996 թ.: Այս տարի այն կտևի մինչև մարտի 4-ը և կներկայացնի անցյալ տարի ստեղծված առավելագույն թվով անիմացիոն ֆիլմեր։
