ՀՀ վարչապետ Տիգրան Սարգսյանը ֆինանսների նախարար Վաչե Գաբրիելյանից բացատրություն պահանջեց գրքերի թանկացման վերաբերյալ: Ըստ նախարարի՝ 2011-2012 թթ. հարկային որևէ փոփոխություն տեղի չի ունեցել, որը կարող էր ազդել գրքերի գների վրա, պարզապես տարընթերցման խնդիր կա՝ կապված ԱԱՀ-ի հետ:
Վ. Գաբրիելյանը հայտնեց, որ ՊԵԿ-ի և մշակույթի նախարարության հետ աշխատել են, պարզաբանում են նախապատրաստել, որը առաջիկա երկուշաբթի կամ երեքշաբթի կհրապարակեն: Նրա խոսքով՝ գրահրատարակիչներն այս պարզաբանումը հասկացել են, սակայն այլ հարց է, որ գրողները նոր արտոնություն են ցանկանում ոլորտի համար:
«Մարդիկ հարց են բարձրացնում` ինչո՞ւ են գները բարձրացրել: Եթե դուք պարզաբանում տվել եք, ենթադրվո՞ւմ է, որ գները պետք է վերադառնան նախկին մակարդակի»,- հարցրեց վարչապետը:
Նախարարը հաստատեց, որ գրքերի գները պետք է իջնեն, բայց եթե դա տեղի չունենա, ապա պատճառը կլինեն շուկայական հարաբերությունները։ Անհրաժեշտության դեպքում նորից կհրավիրեն ոլորտի ներկայացուցիչներին և կբացատրեն:
Տ. Սարգսյանը նշեց, որ պետք է նայել` կա՞ արդյոք մրցակցություն: «Գրքերի 10 նոր խանութներ են բացվել, պետք է որ մրցակցություն լինի»,- նկատեց վարչապետն ու հավելեց, որ ՏՄՊՊՀ նախագահ Արտակ Շաբոյանին պետք է խնդրեն` պարզելու համար, թե մրցակցությունն այդ ոլորտում բավարա՞ր է, և գներն ինչո՞ւ են բարձրացել:
