Վաշինգտոնի դաշնային դատարանն անօրինական է ճանչել ԱՄՆ կառավարությանը կից պարենամթերքի և դեղորայքի վերահսկման վարչության (Food and Drug Administration, FDA) կարգադրությունը՝ ծխախոտի տուփերի վրա պատկերել ծխախոտի բացասական հետևանքները ներկայացնող գրաֆիկական նկարներ:
Ինչպես հաղորդում է Associated Press-ը, դատարանը վճռել է, որ դաշնային իշխանությունների համապատասխան պահանջը անօրինական է, քանի որ հակասում է խոսքի ազատությունը երաշխավորող ԱՄՆ սահմանադրության փոփոխություններին:
Դատարանը համաձայնվել է ծխախոտային ընկերությունների այն պնդմանը, որ, ի տարբերություն տուփերի վրա նշվող փաստացի տեղեկատվության՝ ծխելու վտանգավոր հետևանքների մասին, պատկերը նպատակ ունի վախ ներշնչել և ազդել մարդու զգացմունքների վրա:
Բացի այդ, նկարները բացասաբար են անդրադառնում տուփերի դիզայնի վրա:
Դատարանը նշել է, որ կառավարությունն այլ հնարավորություններ ունի ծխելու դեմ պայքարելու համար, մասնավորապես՝ ծխախոտի հարկերի ավելացում, հակածխախոտային գովազդային արշավներ և այլն:
