Փետրվարի 29-ին սիրիական կառավարության բանակի ստորաբաժանումները Հոմս քաղաքում սկսել են Սիրիայի ապստամբների Ազատ բանակի վրա հարձակումները: Այս մասին հաղորդում է BBC News-ը:
Դամասկոսում պաշտոնատար անձինք հայտարարել են, որ Բաբ-Ամրո շրջանը, որտեղ ապստամբներն առավել ակտիվ են, «կմաքրվի մի քանի ժամվա ընթացքում»: Ըստ տեղեկությունների՝ պաշարված քաղաքի բնակիչները հուսահատ դիմադրություն են ցուցաբերում հարձակվողներին:
Սիրիական անվտանգության ուժերի ղեկավարության անանուն աղբյուրը Agence France-Presse-ին տեղեկացրել է, որ զինվորները շենքից շենք են տեղաշարժվում` խուզարկելով բոլոր շինությունները և նկուղները:
Քաղաքի շատ մասերում էլեկտրականությունն անջատված է, արտաքին աշխարհի հետ հաղորդակցվելը շատ դժվար է:
Այս դեպքերից մի քանի շաբաթ առաջ Հոմսի բնակելի թաղամասերը ենթարկվում էին հրետանու մշտական կրակոցներին, որի արդյունքում զոհվել են հարյուրավոր մարդիկ: Զոհվածների թվում էին երկու օտարերկրյա լրագրողներ` բրիտանացի Մարի Քոլվինը և ֆրանսիացի լուսանկարիչ Ռեմի Օշլիկը:
ՄԱԿ-ի տվյալներով՝ Սիրիայի հակամարտության 11 ամիսների ընթացքում զոհվել է ավելի քան 7500 մարդ:
