2012 թ. բյուջեով աղետի գոտու շինարարության համար հատկացվել է 4 մլրդ դրամ: Այսօր ԱԺ-ում կառավարության հետ հարց ու պատասխանի ժամանակ ԱԺ փոխանախագահ Սամվել Բալասանյանը նշեց, որ այդ հատկացման բացվածքը չկա, և Շիրակի մի շարք գյուղերում՝ Ազատանում, Ախուրիկում, Ախուրյանում, Գետում, Երասխավանում, Ջաջուռում և այլուր, մարդիկ չգիտեն՝ բնակարան ունենալո՞ւ են, թե՞ ոչ: «Երբ վարկ էինք վերցնում, բնակչությանը խոստացանք, որ բնակարանաշինության հարցը կփակվի, բայց ոնց որ թե չի փակվում»,- նկատեց Ս. Բալասանյանը:
Քաղաքաշինության նախարար Վարդան Վարդանյանը պատասխանեց, թե հայտարարություն չի արվել, որ մինչև 2013 թ. բոլոր խնդիրները լուծվելու են: Նրա խոսքով՝ Ախուրյանում ղեկավարի կողմից ներկայացված 104 քաղաքացիները շահառու են ճանաչվել, 25-ի գործերը ժամանակավորապես չի քննարկվել, քանի որ ընտանիքի անդամները բացակայում են երկրից, 25-ին մերժել են: Կան 45 թերի փաթեթներ, որոնք եթե տեսքի բերվեն, կքննարկվեն, և կորոշվի՝ ԲԳՎ տրամադրե՞լ, թե՞ շենք կառուցել: Նախարարի խոսքով՝ ընդհանուր առմամբ, 6,998 շահառուների հարց է դրված եղել:
«Մինչև 2014 հունվարի 1-ը խնդիրը կլուծվի: Ժամանակացույցով կավարտենք»,- ասաց Վ. Վարդանյանը:
Ս. Բալասանյանը հակադարձեց, որ աղետի գոտու բնակարանաշինության ծրագիրը պետք է ավարտվեր մինչև 2013 թ.: «Դա բոլոր կուսակցությունների և նախագահի ծրագրերում կար»,- նկատեց նա:
