2011թ. հունվարի 10-ին պարզ դարձավ, որ հարձակման է ենթարկվել իրավապաշտպան Արտակ Զեյնալյանի աշխատասենյակը: Վերջին 2 ամսվա մեջ սա 2-րդ հարձակումն է իրավապաշտպանի գրասենյակի վրա: Այս պահի դրությամբ իրավապաշտպանի կողմից դեռևս չի հայտնաբերվել որևէ կորած իր աշխատասենյակից: Նախորդ անգամ` դեկտեմբերի 6-ին, 2010թ. անհայտ անձինք ներխուժել էին գրասենյակ, կոտրել փաստաթղթերը պահելու համար նախատեսված պահարանների դռների կողպեքները, տարել համակարգչի մոնիտորը և արբանյակային հեռուստաալիքների կոդազերծող սարքը: Իսկ գրասենյակում գտնվող գումարը «գողերը» չեն վերցրել: Դեպքի առթիվ հարուցվել էր քրեական գործ:
Հելսինկյան Ասոցիացիան համոզված է, որ նախկինում կատարված նմանատիպ դեպքը չի բացահայտվում ոստիկանության անգործության պատճառով և վստահ է, որ այս վերջին նմանատիպ դեպքն էլ չի բացահայտվելու: Հելսինկյան Ասոցիացիան հայտարարում է, որ վերոհիշյալ հարձակումները իշխանության պատվերն է, որն ուղղված է միմիայն Արտակ Զեյնալյանի իրավապաշտպան գործունեության դեմ: Այս տեսակ քայլերը նպատակ են հետապնդում խոչընդոտել իրավապաշտպանի գործունեությանը:
Արտակ Զեյնալյանը հանդիսանում է «Իրավաբաններն ընդդեմ բռնությունների» հասարակական կազմակերպության համակարգող, «Մարտի 1»-ի գործով Հատուկ քննչական ծառայության անգործությունը դատական կարգով վիճարկող իրավահաջորդների, ինչպես նաև 2010թ. ապրիլի 13-ին Չարենցավանի ոստիկանական բաժանմունքում մահացած Վահան Խալաֆյանի գործով տուժողի իրավահաջորդի ներկայացուցիչ: Ա. Զեյնալյանը Մարդու իրավունքների Եվրոպական դատարանում ներկայացրել է մի շարք գործեր, այդ թվում նաև` Մելտեքս ՍՊԸ և Մ. Մովսեսյանը ընդդեմ Հայաստանի Հանրապետության գործը «Ա1+» հեռուստաընկերության վերաբերյալ:
Հելսինկյան ասոցիացիա
Հելսինկյան քաղաքացիական ասամբլեայի Վանաձորի գրասենյակ
10 Հունվարի, 2011թ.