Օհան Դուրյանի շնիկը նույնպես երգել գիտեր

Հայաստանի ժողովրդական արտիստ Ռուբեն Մաթևոսյանը Օհան Դուրյանին նմանեցնում է երեխայի հետ. «Նա երեխայի նման մեկն էր: Նա երեխաների նման շատ կենդանիներ էր սիրում, և նրա տանը շատ կենդանիներ էին ապրում: Նա նույնիսկ շնիկին էր երգել սովորեցրել, ճիշտ երգեցողություն, ճիշտ նոտաներ երգել, շունը նոտան լսում էր և կրկնում էր: Գիտեք, շնիկի հետ Օհան Դուրյանը ֆրանսերեն էր խոսում, շնիկին խնդրում էր երգել մի նոտա, և շնիկը երգում էր, ապշելու բան էր: Օհան Դուրյանն ինձ հետ շատ մտերիմ էր: Նա շատ էր սիրում ժողովրդական երգը, որովհետև խորապես գիտակցում էր, թե ինչ ասել է ժողովուրդ, և ինչ ասել է ժողովրդի երաժշտություն: Ինձ նվիրված հաղորդաշարի ընթացքում նա ասաց, որ եթե երգիչ ծնվեր, կցանկանար երգել ինձ նման»: