Եվրամիությունը մշտապես հայտարարել է, որ օժանդակում է ԵԱՀԿ Մինսկի խմբի աշխատանքներին՝ գիտակցելով, որ դա է ԼՂ հակամարտության կարգավորման ձևաչափը և միաժամանակ համարելով, որ ԵՄ-ն դերակատարում է ունենալու հետկոնֆլիկտյան խաղաղաշինության շրջանակներում: «Առաջին լրատվական»-ի հետ զրույցում նման տեսակետ հայտնեց Մարդկային զարգացման միջազգային կենտրոնի տնօրեն, փորձագետ Թևան Պողոսյանը՝ մեկնաբանելով Եվրամիության ԱԳ նախարարների Խորհրդի երեկվա կոչը՝ ԼՂ հակամարտության համար հետկոնֆլիկտային սցենարներ մշակել և դրանց շուրջ ԵՄ հետագա մասնակցության հիմքեր մատնանշել:
«ԵՄ-ն համարում է, որ լավ կլինի ոչ թե սպասել ինչ-որ լուծումների, այլ հենց այժմվանից փորձել մշակել դրանք: Սա վատ գաղափար չէ, նման քայլի դեպքում հակամարտող կողմերը կհասկանան, թե ինչ կարող են ստանալ այն դեպքում, եթե խնդրի լուծում գտնվի: Ինչ վերաբերում է կոչի այն հատվածին, ուր ԵՄ-ն կարևորում է իր ներկայացուցիչների անհերքելի մուտքը Լեռնային Ղարաբաղ, ապա նման հայտարարությունը մի կողմից կարող է նպաստել, որ ԵՄ-ն իր համար ստեղծի դաշտ, ուր իր պաշտոնյաները Ղարաբաղ մեկնելիս որևէ խնդիր չեն ունենա, մյուս կողմից էլ կառույցն ինչ-որ խնդիր է լուծում՝ ցանկանալով ներկա լինել այդ տարածքում: Ընդհանուր առմամբ, ողջունելի հայտարարություն է, որ ԵՄ ներկայացուցիչներն ուզում են գնալ ԼՂՀ»,- ամփոփեց փորձագետը:
Նշենք, որ Եվրամիության ԱԳ Նախարարների խորհուրդը երեկ կոչ է արել ԵՄ Գերագույն հանձնակատարին և Եվրահանձնաժողովին մշակել հետկոնֆլիկտային սցենարներ ԼՂ հակամարտության համար, ինչը Եվրոպական միության հետագա ներգրավման հիմք կհանդիսանա:
ԵՄ-ն անհանգստացած է ղարաբաղյան հակամարտության հարցով Հայաստանի և Ադրբեջանի միջև բանակցությունների դանդաղ առաջընթացով, ասվում է է Հարավային Կովկասի երկրների վերաբերյալ որոշման մեջ, որն ընդունվել է այսօր Բրյուսելում` ԵՄ Խորհրդի նիստի արդյունքում:
Խորհուրդը կոչ է անում ԵՄ գերագույն հանձնակատարին և Եվրահանձնաժողովին սերտորեն խորհրդակցել ԵԱՀԿ-ի հետ՝ ԼՂ-ի հետկոնֆլիկտային սցենարների շուրջ ԵՄ-ի հետագա մասնակցության հիմքերի նպատակով:
