Ամերիկյան հետախուզական-վերլուծական Stratfor ընկերության ղեկավար Ջորջ Ֆրիդմանն անօրինական է համարել Wikileaks կայքի կողմից Stratfor-ի գաղտնի փաստաթղթերի հրապարակման փաստը: Նա ասել է, որ հրապարակված նամակագրությունը հնարավոր է` կեղծիք է, իսկ դրանց մեկնաբանությունը` խեղաթյուրված:
«Մենք չենք պատրաստվում ոչ հաստատել և ոչ էլ հերքել հրապարակված նամակագրության հատվածների իսկությունը: Մենք նաև չենք բացատրելու, թե ինչ ենք ի նկատի ունեցել ներքին նամակագրության ժամանակ: Մեր սեփականությունը հափշտակվել է, և մենք չենք ցանկանում կրկնակի անգամ տուժած կողմ դառնալ, երբ մեզ հարցնեն մեզնից գողացված փաստաթղթերի բովանդակության մասին»,- ասել է Ֆրիդմանը:
Նա ներողություն է խնդրել իր գործընկերներից, վերլուծաբաններից, փորձագետներից Wikileaks-ի գործողությունների պատճառով` նշելով, որ ինքը հպարտ է, քանի որ իր ընկերությունը վերլուծությունն ու կանխատեսումները կառուցում է բացառապես վստահելի և հեղինակավոր փորձագետների հետ համագործակցելով: Նաև հավելել է, որ իր ղեկավարած ընկերությունը որևէ կապ չունի ԱՄՆ պետական գերատեսչությունների հետ:
Հիշեցնենք, որ երեկ Wikileaks կայքը սկսել է հրապարակել «ստվերային ԿՀՎ» անվանվող Stratfor ընկերության ներքին նամակագրությունը, գաղտնազերծել այդ վերլուծական կենտրոնի հետ գաղտնի համագործակցող անձանց անունները, որոնց թվում են օտարերկրյա հայտնի քաղաքական գործիչներ և պաշտոնյաներ:
