Կոնգրեսականներն ուժեղացրել են ճնշումը ԱՄՆ նախագահ Բարաք Օբամայի վրա՝ փորձելով ստիպել նրան օգտագործել ռազմավարական նավթային պաշարները՝ սև ոսկու գինն իջեցնելու համար,- գրում է The Financial Times-ը:
«Ուրբաթ նավթի գնի բարձրացումը 9 ամսվա առավելագույնի՝ 125 դոլարի, խոսակցությունների առիթ է տվել առ այն, որ ԱՄՆ-ը և նրա դաշնակիցները համակարգված ջանքերի շրջանակներում իրենց ռազմավարական պաշարներից շուկա կուղարկեն նավթի լրացուցիչ խմբաքանակ, ինչպես դա տեղի ունեցավ անցյալ տարվա ամռանը, երբ դադարեցվեց Լիբիայից նավթի արտահանումը,- գրում է պարբերականը:- Եթե նախկինում Սպիտակ տունն ամբողջությամբ հերքում էր նման հնարավորությունը, ապա ուրբաթ ԱՄՆ ֆինանսների նախարար Թիմոթի Գայթները հայտարարեց, որ «որոշակի հանգամանքների» դեպքում նավթային ռազմավարական պաշարները կարող են գործի դրվել»:
Թերթը բերում է տեխասյան Strategic Petroleum Consulting խորհրդատվական ըկերության փորձագետ Ջոն Շեյջեսի կարծիքը, որի համաձայն՝ «եթե նավթի գնի ներկայիս աճը պահպանվի, ապա շատ շուտով տնտեսությունն իր վրա կզգա դրա բացասական ազդեցությունը»: «Հազիվ թե ինչ-որ մեկը ցանկանա դարձյալ տեսնել մեկ բարել նավթի արժեքը 147 դոլար՝ ռեկորդային մակարդակ, որը գրանցվել է 2008 թ.»,- նշել է նա:
Financial Times-ը հայտնում է, որ անցյալ շաբաթ 3 դեմոկրատ կոնգրեսականներ նամակ են հղել Բարաք Օբամային, որում նշել են պետական ռազմավարական պաշարներից նավթ մատակարարելու անհրաժեշտությունը:
