Այսօր մեկնարկած Ազգային ժողովի քառօրյա նիստերի ժամանակ պատգամավորների քննարկմանն է կրկին ներկայացվել «Արտակարգ դրության իրավական ռեժիմի մասին» օրինագիծը:
«Ժառանգություն» խմբակցության ղեկավար Ստյոպա Սաֆարյանը հայտարարեց, որ կառավարությունը փետրվարի 22-ին ետ վերցրեց օրինագիծը՝ լրամշակելու նպատակով, փետրվարի 23-ին ներկայացրեց իբրև լրամշակված, իսկ 1 օր անց քննարկության դրվեց ԱԺ պետաիրավական հարցերի հանձնաժողովում: Ըստ Ս. Սաֆարյանի՝ այս օրինագիծը դժգոհություն էր հարուցել ոչ միայն խորհրդարանական, այլև արտախորհրդարանական ուժերի մոտ, և այս հապճեպությունն անընդունելի է: «Տարօրինակ է, որ կառավարությունը շատ յուրօրինակ է մեկնաբանում Սահմանադրությունը: Խոսքը վերաբերում է ԱԺ դերակատարությանը և բանակի ներգրավմանը արտակարգ դրության ժամանակ»,- նշեց Ս. Սաֆարյանը:
ԱԺ նախագահ Սամվել Նիկոյանը հակադարձեց՝ ասելով, թե օրինագծի ներկայացումը հապճեպ չէ. «Կառավարությունը վերցրել էր լրամշակման, որ դիտողություններն ընդունի ու նորից ներկայացնի: Եթե դա հապճեպ եք համարում, անընդունելի է»,- ասաց Ս. Նիկոյանը և հավելեց՝ ինչքան էլ այս նախագիծը քննարկվի, կողմերի դիրքորոշումը չի փոխվելու: Աժ նախագահը վստահեցրեց, որ նախորդ քննարկման ժամանակ Ս. Սաֆարյանի հնչեցրած շատ մտքեր հաշվի են առնված:
«Ժառանգություն» խմբակցության քարտուղար Լարիսա Ալավերդյանը հայտարարեց, որ արդարադատության նախարարի կողմից արհամարհանք է «անհրաժեշտաբար լսումներ կազմակերպելու» մասին հնչեցրած պահանջը չկատարելը: «Եվ բերվում է նորից այդ օրենքը՝ առանց պատշաճ քննարկման և խորհրդարանական լսումների»,- նշեց Լ. Ալավերդյանը:
